13 pasuri të paluajtshme (sipërfaqe toke) janë konfiskuar nga policia me vendim të GJKKO-së.
Bëhet fjalë për tokë në bregdet, arë dhe pemëtore me një sipërfaqe në total 83 497 m² në zonën e Ranës së Hedhun, Ishull Lezhë, Tale dhe Vain, të cilat janë përfituar nga aktivitete kriminale.
Konfiskimet vijnë në kuadër të operacionit të koduar “Harta”, ndërsa më herët, më 22 tetor, u konfiskuan 7 pasuri të tjera në bregun e lumit Drin dhe në Ishull Shëngjin, me sipërfaqe 15 028 m².
Në total, gjatë një jave, në këtë qark janë sekuestruar me 20 pasuri me sipërfaqe totale rreth 98 525 m².
Njoftimi i policisë së Lezhës:
Finalizohet operacioni i koduar “Harta”.
Konfiskohen 13 pasuri të paluajtshme (sipërfaqe toke), me sipërfaqe totale 83 497 m², në Ranë të Hedhun, Ishull Lezhë, Tale dhe Vain.
Konfiskimi, në zbatim të një vendimi të GjKKO-së, pasi pasuritë janë përfituar nga veprimtari kriminale.
Gjatë 1 jave, u konfiskuan në qarkun Lezhë, në zbatim të 2 vendimeve të GjKKO-së, 20 pasuri me sipërfaqe totale rreth 98 525 m², me burime kriminale.
Në zbatim të këtij vendimi të vitit 2021, të lënë në fuqi me vendim të Gjykatës së Posaçme të Apelit për Korrupsionin dhe Krimin e Organizuar, të vitit 2022, specialistët e Seksionit për Hetimin e Krimeve Ekonomiko-Financiare të DVP Lezhë, në bashkëpunim me specialistët e Agjencisë së Administrimit të Pasurive të Sekuestruara dhe të Konfiskuara, konfiskuan, në kuadër të operacionit “Harta”, 13 pasuri të paluajtshme të llojeve “Tokë në bregdet”, “Arë” dhe “Pemëtore”.
Nga hetimet është provuar se pasuritë, me sipërfaqe totale 83 497 m², që ndodhen në Ranë të Hedhun, Ishull Lezhë, Tale dhe Vain, janë përfituar nga veprimtari kriminale.
1 javë më parë, në vijim të punës për gjurmimin e aseteve me burime të kundërligjshme, u konfiskuan në zbatim të një vendimi tjetër të GjKKO-së, 7 pasuri të ndodhura në bregun e lumit Drin dhe në fshatin Ishull Shëngjin, me sipërfaqe totale 15 028 m².
j.l./ dita
