Konflikti në Lindjen e Mesme ka dhënë ndikim të menjëhershëm në tregun e turizmit, duke shkaktuar anulime masive të rezervimeve nga shqiptarët drejt destinacioneve që vetëm një vit më parë ishin ndër më të preferuarat, siç janë Emiratet e Bashkuara Arabe dhe Turqia.
Sipas operatorit turistik Besnik Vathi, vetëm gjatë 10 ditëve të para të konfliktit është shënuar një rënie drastike.
“Unë mund të them që për në Dubai për shembull mund të jenë anuluar diku te 2000 persona. Frenimi i rezervimeve gjatë periudhës së luftës shkoi deri në 70% rënie. Ishte një rënie e menjëhershme përveç anulimeve drejt udhëtimeve drejt Lindjes së Mesme, Emirateve të Bashkuara. Për udhëtimet drejt Stambollit apo Kapadokia ka rezervime po është më i ulët numri i rezervimeve me atë që ka qenë më përpara. Për periudhën e verës për plazhe, ritmi i rezervimeve ra menjëherë gjatë kohës së luftës.”, thotë Besnik Vathi.
Vathi shpjegon se arsyeja kryesore është frika dhe pasiguria.
“Është një frenim më shumë i vendimmarrjes për të udhëtuar sesa i mungesës së dëshirës për të udhëtuar. Pra është frenim i asaj që ë pse të vendosim tani se kush e di se ç’ndodh. Pra i frikës e shoqëruar me atë që le ta shtyjmë pak më vonë”, thekson Vathi
Në Antalia të Turqisë, e cila tërheq një numër të lartë peshuesish gjatë verës, operatorët e atjeshëm po ofrojnë ulje të çmimeve të paketave si kundërpeshë përballë pasigurisë që ofron situata, tregon Mikel Zinxhiria, operator turistik në Vlorë
“Vetëm jo më para se tre ditë erdhi një ulje e re çmimesh nga destinacionet e Antalias vetëm nga frika e pezullimit të rezervimeve dhe është fakt.”, thotë Zinxhiria.
Ata që e kanë përqendruar aktivitetin në turizmin vendas, e shohin gjendjen e krijuar si një mundësi për më shumë vizitorë gjatë këtij sezoni. Kërkesa për pushime në bregdetin shqiptar mbetet e lartë, me Vlorën dhe vijën bregdetare deri në Sarandë që konsiderohen si zonat më të kërkuara.
“Kemi pasur dhe vazhdojmë të kemi kërkesa për sektorin e akomodimit nga çdo ditë. Unë mund t’ju them që jemi mangut në sektorin e akomodimit. Pra, nuk do të kemi mundësi të plotësojmë të gjitha kërkesat afatgjate nga të gjithë operatorët turistikë”, thotë Vasil Bedinaj kreu i operatorëve turistikë
Sipas Bedinajt, nga Vlora deri në Sarandë, hotelet më të mëdha janë tanimë të prenotuara.
