Zbardhet lista paraprake e renditjes së kandidatëve që janë në garë për kuotat e pranimeve të reja të 2023 në programet e ciklit të tretë të specializimeve afatgjata në mjekësi.
Fakulteti i Mjekësisë, ka konfirmuar pikët që çdo kandidat ka marrë nga dhënia e provimit të informatizuar gjatë javës së shkuar, si dhe pikët e fituara nga vlerësimi i mesatares së studimeve universitare. Renditja nis me kandidatët që kanë nivelin më të lartë të pikëve, e vijon në rend zbritës deri tek kandidati që ka edhe më pak pikë.
“Vlerësimi i kandidatëve që konkurruan për kuotat e pranimit për këtë vit akademik bëhet me një sistem prej 1000 pikësh maksimumi. Këto pikë konvertohen në 30 për qind (300 pikë) me të cilat vlerësohet nota mesatare e ponderuar e rrumbullakosur me dy shifra pas presjes dhjetore, si dhe 70 për qind (700 pikë) që kandidati i siguron në testimin e informatizuar që u zhvillua në ambientet e Qendrës së Shërbimeve të Arsimit në mbyllje të javës së shkuar”, bëjnë me dije autoritetet e këtij fakulteti në lidhje me skemën e vlerësimit.
Kështu, kandidatët që kanë pikët më të larta do të ftohen të parët për të zgjedhur programin në të cilin duan të vijojnë studimet e ciklit të tretë të specializimeve afatgjata.
Zgjedhja e programit të specializimit bëhet nga vetë kandidati brenda dy ditëve nga shpallja e rezultateve finale. Vetëm kandidatët që kanë grumbulluar jo më pak se 380 pikë nga numri i pikëve totale të konvertuara (maksimumi 1000 pikë, kualifikohen për procesin e përzgjedhjes së programit të specializimit sipas sistemit të meritës.
Për garën e pranimeve të reja të këtij viti, programet e studimeve të specializimeve afatgjatë janë miratuar kuota pranimi për specialitete të tilla si: Alergologji, Anatomi patologjike, Anestezi-reanimacion, Dermatologji, Endokrinologji, Gastrohepatologji, Hematologji, Diagnozë me imazhe, Kardiokirurgji, Kardiologji, Kirurgji e përgjithshme, Kirurgji maksilo-faciale, Laborator klinik-biokimik, Mikrobiologji, Mjek familjeje, Mjekësi interne, Mjekësi ligjore, Nefrologji, Neurologji, Neurokirurgji, ORL, Obstetrikë-gjinekologji, Okulistikë, Onkologji, Ortopedi-traumatologji, Pediatri, Pedodonti, Pneumonologji, Psikiatri, Psikiatri e fëmijëve dhe e adoleshentëve, Reumatologji, Sëmundje infektive, Shëndet publik, Terapi stomatologjike, Toksikologji klinike, si dhe stomatologji (kirurgji orale, kirurgji maksilo- faciale, protetika fikse, protetika të lëvizshme, protetika kirurgjikale, ortodonci periodontologji).
p.k\dita
