Festim Bexhdili, kopshtari i resortit ‘Golden’, ku u mbajt, u torturua për vdekje dhe më pas u zhduk Jan Prenga, ka bërë rekurs në Gjykatën e Lartë. Bexhdili, i dënuar me burgim përjetë nga GJKKO, ka kërkuar lirinë. Gjykata e Posaçme e Apelit për Korrupsionin dhe Krimin e Organizuar la në fuqi më 20 mars vendimin e “shkallës së Parë” për Bexhdilin, si i përfshirë në pengmarrjen dhe vrasjen e Jan Prengës, teksa ishte i fundit që pati kontakt me trupin, teksa e transportoi me furgon dhe u kap nga kamerat e sigurisë. Meqenëse refuzoi bashkëpunimin me drejtësinë për të treguar se ku u gropos trupi, ai mori dënimin maksimal nga gjykata.
Dënimin përjetë Bexhdili po e vuan në një burg të sigurisë së lartë për katër akuza, rrëmbim dhe zhdukje personi duke i shkaktuar vdekjen, fshehje dhe asgjësim kufome, armëmbajtje pa leje dhe pjesëmarrje në grup të strukturuar kriminal. Ndërkohë, GJKKO dënoi me tre vite burg Olsi Turjan, i cili akuzohet se kreu veprimeve që penguan zbardhjen e ngjarjes, por konsiderohet dënim i kryer pasi prej kohësh qëndronte në masën “arrest shtëpie”.
