Një tjetër shpërthim ka ndodhur ditën e djeshme në të zbardhur, por këtë herë në Korçë. Në oborrin e një vile të pabanuar në Bulgarec, persona ende të paidentifikuar kanë hedhur një granatë dore, duke shkaktuar vetëm dëme të vogla materiale. Shtëpia ishte e pabanuar prej 4 vitesh, pasi pronari Qazim Leshnja dhe bashkëshortja e tij, kanë ndërruar jetë dhe nuk kanë lënë fëmijë. Fqinjët tregojnë se për mirëmbajtjen e vilës kujdesej motra e të ndjerit, ndaj edhe motivet mbeten të panjohura, megjithëse dyshohet tek konfliktet e trashëgimisë mes të afërmve të bashkëshortëve të ndjerë.
“Në fshatin Bulgarec, Korçë, në oborrin e një banese të pabanuar pasi pronarët kanë ndërruar jetë 4 vite më parë, dyshohet se ka plasur një granatë dore. Grupi hetimor po punon për sqarimin e rrethanave të ngjarjes”, ka njoftuar policia. Pista kryesore e hetimeve është konflikti i pronësisë, pasi të afërmit e Leshnjes nuk bien dakord për ndarjen e pasurisë. Policia ka nisur hetimet për zbardhjen e ngjarjes me sekuestrimin e kamerave të bizneseve dhe pyetjen e familjarëve.
Nipi i familjes në ndërtesën e të cilëve shpërtheu një granatë dore thotë se janë të tronditur nga ngjarja. Ai shprehet se familja e tij nuk ka asnjë konflikt. “Po kaloja për në punë dhe pashë polici këtu. Pashë çfarë ka ndodhur. Nuk di gjë kush e ka bërë. Jemi të tronditur. S’kemi konflikt me asnjërin”, tha ai. Policia shpjegoi se ka pasur vetëm dëme të vogla materiale dhe se janë shumë afër zbardhjes së ngjarjes. Gjithashtu janë shoqëruar disa persona të dyshuar të të dy familjeve në konflikt, që u morën në pyetje dhe më tej u lanë të lirë.
