Nga Orgen Peci
Në faqet 6-7 të numrit të sotëm është botuar një analizë nga Uashingtoni që nxjerr në pah një realitet të hidhur politiko-diplomatik për hapësirën shqiptare në raport me politiken e jashtme të SHBA-së.
Pavarësisht përpjekjeve, nënshtrimit dhe mbështetjes pa rezerva që udhëheqësit shqiptarë (si në Tiranë me projekte luksoze si ato të familjes Trump, ashtu edhe në Prishtinë) i ofrojnë Uashingtonit, shqiptarët po e humbasin terrenin strategjik.
Në të njëjtën kohë, Serbia — me gjithë qëndrimet e saj të hapura filoruse, blerjen e armatimeve kineze dhe glorifikimin e figurave kontroverse të së kaluarës — po ripozicionohet nga Shtëpia e Bardhë si një “partner i preferuar” strategjik.
Ky ndryshim në gjeopolitikën rajonale dhe zhvendosja e vëmendjes apo “favorizimi” pragmatik i Serbisë nga ana e SHBA-së nuk është absolutisht vetëm faj i amerikanëve. Uashingtoni udhëhiqet gjithmonë nga realpolitika, interesi kombëtar, biznesi, dhe gjeostrategjia e çastit.
Një pjesë mjaft të madhe të përgjegjësisë – ndoshta kryesoren në afatgjatë – e mbajnë vetë liderët shqiptarë në Tiranë, Prishtinë dhe Shkup. Mbi të gjitha, mungesa e koordinimit dhe strategjisë së përbashkët Tiranë-Prishtinë e ka lënë faktorin shqiptar të fragmentuar.
Korrupsioni i lartë në Tiranë ka një ndikim shkatërrues dhe të drejtpërdrejtë. Një shtet i korruptuar ka ushtri të dobët, drejtësi të kapur, ekonomi informale dhe eksod masiv të popullsisë. Një shtet që zbrazet nga rinia dhe nuk prodhon dot ekonomikisht, nuk mund të jetë partner i fortë gjeopolitik.
Amerikanët po ndjekin interesin e tyre pragmatik. Ne shqiptarët e morëm mbështetjen e SHBA-së si një dhuratë të përhershme falas, ndërsa vetë e katandisëm shtetin në një sistem korruptiv, pa prodhim, pa vizion ushtarak e diplomatik, dhe me një diplomaci servile që shet pasuritë kombëtare për të blerë buzëqeshje politike në Uashington.
Për sa kohë politika shqiptare do bazohet te korrupsioni dhe servilizmi, Serbia, edhe si filoruse, do të vijojë të lexohet si faktori me të cilin duhet të “bëhet biznes”.
