Presidenti i Rusisë, Vladimir Putin, tha se nuk ka asgjë të pazakontë në stërvitjet e planifikuara të vendit të tij me armët taktike bërthamore.
Ministria e Mbrojtjes e Rusisë tha të hënën se do të praktikojë dislokimin e këtyre armëve në jug të Rusisë, bashkë me Bjellorusisë, pas “deklaratave kërcënuese” nga Perëndimi.
“Nuk ka asgjë të pazakontë këtu, kjo është punë e planifikuar, është stërvitje”, tha Putin, raporton agjencia shtetërore e lajmeve TASS.
Vitin e kaluar, ai ka thënë se Moska ka transferuar disa armë taktike bërthamore në Bjellorusi.
Ka qenë kjo lëvizja e parë e tyre jashtë Rusisë që nga rënia e Bashkimit Sovjetik, në vitin 1991.
Duke folur të enjten përkrah presidentit bjellorus, Alexander Lukashenko, Putin tha se i ka sugjeruar Bjellorusisë që të angazhohet në një nga pjesët e stërvitjeve të planifikuara.
“Siç më ka thënë edhe ministri rus i Mbrojtjes, tashmë kemi filluar t’i zbatojmë këto udhëzime”, tha Lukashenko.
Se kur saktësisht do të mbahen stërvitjet, nuk është e qartë.Roli i armëve bërthamore strategjike është t’i godasin objektivat e armikut larg vijës së frontit, ndërsa armët bërthamore taktike janë krijuar për t’u përdorur në fushat e betejës.
Rusia ka arsenalin më të madh të armëve bërthamore në botë.
Ministria e Mbrojtjes e Rusisë tha se stërvitjet kanë për qëllim t’i rrisin aftësitë e ushtrisë ruse “për të siguruar integritetin territorial dhe sovranitetin e shtetit rus”, në përgjigje të “deklaratave provokuese dhe të kërcënimeve të zyrtarëve perëndimorë ndaj Federatës Ruse”.
Ajo nuk specifikoi më shumë, por, javën e kaluar, presidenti i Francës, Emmanuel Macron, përsëriti deklaratën se vendi i tij nuk mund ta përjashtojë dërgimin e trupave në Ukrainë, për ta ndihmuar atë në luftën kundër pushtimit rus.
b.m/dita
