Kreu i Autoriteti të Konkurrencës, Denar Biba ka raportuar pothuajse për 4 orë në Komisionin e Ekonomisë.
Përpara deputetëve, Biba kërkoi më shumë hapësira ligjore për të kryer hetime në disa tregje sensitive, pasi verifikimi i të dhënave për të faktuar se ka abuzime, në shumicën e rasteve është i pamundur, dhe si rezultat edhe masa apo ndëshkime nuk ka.
Kështu, në një tentativë për të justifikuar rezultatet e Autoritetit, Biba deklaroi me një seriozitet të admirueshëm se “homologët tanë ju marrin celularët”, dhe se, edhe ai do të donte t’i kishte këto “hapësira ligjore”, për të hetuar më mirë tregjet problematike.
E meqë “celulari është tradhtari më i madh”, sipas tij, ndoshta në emër të konkurrencës së ndershme do të na duhej t’i dorëzonim telefonat bashkë me kodin PIN… për çdo rast.
“Homologët tanë ju marrin celularët. Ky (celulari) është tradhtari më i madh për çdo lloj gjëje. Nëse do realisht të bësh punë skrupuloze hetimore, kjo është. Edhe ata zotërinjtë e SPAK-ut apo të prokurorisë në Shqipëri shumicën e sukseseve të tyre e kanë pasur nga sky nga Encrochat. Ne nuk e kemi këtë mundësi. Polakët e kanë, turqit e kanë, italianët, gjermane, të gjithë vendet e BE-së i kanë”, tha Denar Biba.
Biba harron që Autoriteti i Konkurrencës nuk është as prokurori, as polici, as agjenci inteligjente. Hetimet që ky institucion kryen mbeten në kuadër dhe në kufijtë e kompetencave të këtij institucioni.
Ligji shqiptar për mbrojtjen e të dhënave personale e ndalon qartësisht ndërhyrjen në komunikimet elektronike, përveç rasteve të përcaktuara nga Kodi i Procedurës Penale, ku përgjimi mund të kryhet vetëm me urdhër gjykate dhe për hetime penale.
Asnjë rregullore e BE-së apo direktivë e saj nuk lejon mbledhjen e të dhënave private pa autorizim gjyqësor dhe sidomos një përgjim masiv të Kompanive. Përndryshe, flasim për shkelje flagrante të të drejtave themelore të njeriut, e jo për hetim të tregut të qumështit.
Në vend që të kërkojë më shumë kompetenca për të përgjuar telefonat, ndoshta Autoriteti i Konkurrencës duhet të përmirësojë mënyrën se si i mbledh provat, si i monitoron çmimet, ndëshkon subjektet dhe parandalon abuzimet që çdo qytetar i ndjen në faturën e përditshme.
j.l./ dita
