Lidhur me aksidentin që ndodhi në kryeqytet, më 27 shkurt ka folur kryetari i Shoqatës të Transportit Qytetas Kostandin Foni, gjatë një emisioni televiziv.
Foni u shpreh se shkaku ka qenë për shkak të gjendjes shëndetësore të drejtuesit të urbanit.
“90% e aksidenteve, të gjitha rastet nuk kanë qenë fajtorë autobusët. Ky është një rast që si e tregojnë dhe pamjet autobusi ka ardhur në korsinë e vet por aty duket pas kryqëzimit që merr trajektore në korsinë e dytë, duket që as nuk frenon as mban korsinë e tij për të hipur e zbritur pasagjerët.
Duket që është në gjendje të lirë autobusi dhe shoferi ka qenë i pavetëdijshëm. Ai vuan nga një sëmundje e diabetit, mund të ketë pasur rënie të sheqerit apo tension. Këtu ka një gabim njerëzor, ai që drejton një autobus 12 metra, apo 8 metra dhe ai njeri është, këtu ka një gabim njerëzor që duhet pranuar”, tha Foni.
Ndër të tjera Foni u shpreh se kohët e fundit është bërë shumë e vështirë për operatorët e transportit publik që të gjejnë staf profesionist.
“Në këtë periudhë e kemi ngritur këtë shqetësim. Mungesa e stafit është shqetësues, ndihet si për shoferë dhe faturino”.
Ndërsa theksoi se infrastruktura është bërë shpesh edhe shkak për aksidente që kanë ndodhur më herët me urbanët në kryeqytet.
“Një nga kërkesat tona ka qenë infrastruktura, korsitë e dedikuara, që për momentin janë vetëm në disa akse. E kemi ngritur si shqetësim se po të ngresh një dron në Tiranë është e frikshme të shohësh mos respektimin nga mjetet private të korsive. Transporti publik duhet të ketë përparësi.
Autobusi që përfundoi në Lanë u pengua nga mjetet e parkuara dysh. Kurse rasti kur rrëshkiti dhe goditi stacionin, ato pllaka në atë segment tek Materniteti, kanë lagështirë, aty rrëshket, është infrastruktura e gabuar për të pasur stacion në atë segment. Infrastruktura e duhur do e lehtësobte transportin publik. Shumë e domosdoshme për qytetarët dhe operatorët për një shërbim sa më cilësor”, tha ai.
j.l./ dita
