Pas zemëratës që ka ngjallur në publik, fakti i lirimit nga burgu të kriminelit Dan Hutra, autor i masakrës së djeshme në Tiranë ku u vranë 3 gra në një hark kohor 33 minuta, vjen dhe përgjigjia nga Prokuroria e Tiranës.
Në njoftimin e saj, Prokuroria sqaron se më 16 qershor të vitit 2022, ish-bashkëshortja e tij Elena Hysa ka njoftuar shërbimet e policisë se ndihej e rrezikuar nga Dan Hutra i cili ndodhej në banesën e saj.
Më pas ka qenë nëna e saj Kujtime Hysa e cila mbeti e plagosur, që ka kërkuar që vajza të tërheqë denoncimin për të mos pasur probleme me Hutrën dhe familjen e tij.
Pavarësisht se Elena Hysa nuk ka pranuar t’u përgjigjet pyetjeve të policisë, është pajisur me urdhër mbrojtjeje. Ndërsa prokuroi i çështjes ka kërkuar dënimin e tij me 1 vit e 6 muaj burg.
NJOFTIMI I PROKURORISE
Duke marrë shkas nga interesi i medias dhe publikut në lidhje me ngjarjet e datës 01.03.2023 dhe shtetasin D.H., Prokuroria Pranë Gjykatës së Shkallës së Parë Tiranë, informon se: Në Prokurorinë Pranë Gjykatës së Shkallës së Parë Tiranë, është regjistruar procedimi penal nr.4719 në ngarkim të personit në hetim D.H., për veprën penale ‘Dhunë në familje’ parashikuar nga neni 130/a i Kodit Penal.
Nga aktet e procedimit, rezulton se:
Më datë 16.06.2022, shtetasja A.H., ka njoftuar shërbimet e policisë se ndihet e rrezikuar nga shtetasi D.H., i cili ndodhej në banesën e saj. Për ngjarjen është pyetur edhe shtetasja K.H., e cila deklaroi se e bija është keqtrajtuar.
Ajo ka deklaruar se ka biseduar me bashkëshortin dhe nuk duan që të kenë probleme me familjen dhe njerëzit e shtetasit D.H., dhe se kërkojnë që vajza të heqë denoncimin dhe të mos merret shteti me këtë punë. E pyetur nga ana e Policisë Gjyqësore nëse është kanosur nga shtetasi D.H., në banesën e saj, ajo nuk ka pranuar t’i përgjigjet kësaj pyetjeje.
Për këtë ngjarje, është plotësuar kërkesë për urdhrin e mbrojtjes së shtetases E.A. Duke pasur parasysh se ky shtetas shfaq rrezikshmëri të lartë shoqërore si dhe nga verifikimet rezulton se shtetasi D.H., ka qenë person i dënuar për veprën penale “Vrasja për shkak të marrëdhënieve familjare”, parashikuar nga neni 79/c i Kodit Penal i dënuar me 25 vite burgim (kryer 13) pasi në vitin 2007 ka vrarë bashkëshorten e tij, shtetasen D.H., dhe bazuar në nenin 251/2 të Kodit të Procedurës Penale, u vendos arrestimi në flagrancë i këtij shtetasi.
Prokurori i çështjes, Robert Kote, kërkoi dërgimin në gjyq të procedimit penal nr. 4719 të vitit 2022 me të pandehur shtetasin D.H., i akuzuar për veprën penale ‘Dhunë në Familje’ parashikuar nga neni 130/a, paragrafi i parë i Kodit Penal dhe kërkoi dënimin e tij me 1(një) vit e 6 (gjashtë) muaj burg. Meqenëse gjykimi u zhvillua i shkurtuar, ndaj kësaj mase dënimi u kërkua të aplikohet neni 406 i Kodit të Procedurës Penale duke i ulur 1/3 e dënimit.”- thuhet në njoftimin e prokurorisë.
m.b./dita
