Këtë të hënë, në Kuvendin e Shqipërisë, pritet një seancë plenare me rend dite të ngarkuar, pasi do të raportojnë drejtuesit e disa prej institucioneve më të rëndësishme të sistemit të drejtësisë dhe rendit në vend.
Në fillim të seancës, deputetët do të miratojnë procesverbalin e seancës së kaluar dhe më pas do të shqyrtojnë dy projektvendime të rëndësishme, atë për ngritjen e Komisionit të Posaçëm Parlamentar për Reformën Zgjedhore dhe Komisionin e Posaçëm për Reformën Administrativo-Territoriale.
Pas këtyre, Kuvendi do të dëgjojë raportimet vjetore për vitin 2024 nga drejtuesit e institucioneve të drejtësisë. Në foltore do të dalë Prokurori i Përgjithshëm, Olsian Çela, për të paraqitur gjendjen e kriminalitetit në vend, ndërsa më pas do të raportojë drejtuesi i SPAK, Altin Dumani, për luftën kundër korrupsionit dhe krimit të organizuar.
Raportimi i Dumanit pritet të jetë ndër më të ndjekurit dhe më të ngarkuarit politikisht.
Përballë tij, opozita e udhëhequr nga Sali Berisha pritet të zhurmojë për hetimet që kanë përfshirë zyrtarë të lartë të qeverisë, ndërsa vetë maxhoranca do shihet si do ta presë, duke qenë se një prej figurave të saj kryesore, zëvendëskryeministrja Belinda Balluku, është aktualisht nën hetim nga SPAK.
Kështu, Dumani pritet të gjendet mes dy presioneve të forta politike, duke e kthyer raportimin e tij në një moment të ndjeshëm për balancat mes politikës dhe drejtësisë.
Raporte për punën e tyre do të paraqesin gjithashtu Inspektori i Lartë i Drejtësisë, Artur Metani, Kryetari i Këshillit të Lartë Gjyqësor, Ilir Rusi, dhe Kryetarja e Këshillit të Lartë të Prokurorisë, Mirela Bogdani.
Seanca pritet të zgjasë gjatë gjithë ditës së hënë, për shkak të volumit të madh të raportimeve dhe debateve parlamentare.
