“Kryetar, si të votoj, pro apo kundër?” Ç’po ndodh mes socialistëve? Braçe debat me Ballën dhe Klosin

Në seancën e sotme parlamentare gjatë diskutimit të aktit normative të buxhetit, deputeti socialist, Erion Braçe tha se propozimet e tij për kalimin e një pjese të parave të pashpenzuara te bujqit, u rrëzua para disa javësh në Kuvend dhe tani ka ardhur si propozim përmes aktit normativ.

Ai pyeti me ironi kryetarin e grupit të PS-së, Taulant Balla nëse këtë herë duhet të votonte pro apo kundër, meqenëse propozimi i tij identik rrëzuar nga grupi i PS-së më parë.

Debati:

Braçe: Paratë që shkojnë te pensionistët shumë mirë dhe do të ishte mirë që shkojnë atje. Qeveria thotë 15 miliardë, ndërkohë që unë mendoj që deficit i parealizuar është 30 miliardë. I kërkoj kryetarit të grupit tim parlamentar, si të votoj sot, se është propozimi im ky i votuar kundër pak ditë më parë. Këtu ka para të tjera për të shlyer detyrimet e bujqve.

Balla: Jam dakord me shqetësimet që ngrihen për tiu gjendur pranë banorëve, bujqve të prekur nga fenomenet natyrore si përmbytje dhe ngrica. Jam informuar që qeveria qendore dhe vendore po bëjnë vlerësimin e dëmeve. Sa i përket aktit normative që po shqyrtojmë, e dinë të gjithë, që akti normative nuk ndryshohet dot sot. Amendamente mbi aktin nuk bëjmë dot. E vlerësoj shumë shqetësimin që ngriti anëtari I grupit tim parlamentar, Brace.

Braçe: Nuk kam kërkuar ndryshim të aktit. Thashë që amendamenti që u rrëzua me votë 4-5 javë më parë, është sjellë me akt sot. Pyeta si duhet të votoj unë. Atëherë votova pro, sot duhet të votoj kundër. Nga 30 miliardë që është deficiti i parealizuar, 15 miliardë do të shkojnë për pensionet, 15 të tjera të shkojnë për të shlyer bujqit. Kaq iu thashë.

Pas këtij debati, Deputetët e Partisë Socialiste, Braçe ka debatuar edhe me Blendi Klosin, lidhur me një plan të qeverisë për t’i dhënë prioritet fuqizimit të sportit të Padelit në Shqipëri.

Klosi tha se ky sport, që sipas një pjese të madhe të deputetëve shihet si një sport luksi, mund të ndihmojë në rritjen e imazhit të Shqipërisë dhe të ofertës turistike për vendin tonë.

Braçe ishte kundër këtyre planeve të qeverisë, duke theksuar se 2.2 milionë euro për kuota pjesëmarrjeje në aktivitete, janë shumë para, të cilat sipas tij mund të investoheshin diku tjetër.

Po ashtu Braçe theksoi se nëse ka një sport që sot është në ditët e tij më të këqija, ai është Futbolli, sport i cili sipas tij po jep shpirt.

Situata mes socialistëve ishte sërish e tensionuar edhe në ulëset e parlamentit. Siç duket dhe në videot e mëposhtme debati mes Klosit dhe Braçes ka vazhduar.

j.l./ dita