Kulla e radhës që do hajë Pallatin e Kongreseve dhe lulishten përfundon me firmën e Ramës sërish në duart e familjes Berisha

Ajo që nisi si një projekt për “rikualifikimin dhe revitalizimin” e Pallatit të Kongreseve, ka përfunduar sërish në të njëjtin destinacion: një tjetër kullë shumëkatëshe në zemër të Tiranës.

Pas lejeve të shumta të ndërtimit të dhëna për Fatmir Bektashin (ortakun e dhëndrit të Sali Berishës), kryeministri Edi Rama duket se ka bërë qokën e radhës për familjen e kreut të opozitës.

Këtë herë, përfitues i hapësirës publike pranë Pallatit të Kongreseve është kompania “KLAR” sh.p.k., në pronësi të biznesmenit Shkëlqim Beshiri, i njohur gjerësisht në rrethet publike si “presta nome” (emër i huazuar) i Shkëlzen Berishës.

Skema e Konkursit dhe Konsorciumi Fitues

Nën maskën e gjelbërimit dhe ruajtjes së identitetit të objektit, Korporata e Investimeve Shqiptare (AIC), e drejtuar nga Elira Kokona, shpalli garën më 27 nëntor 2025 për “Zhvillimin nëpërmjet sipërmarrjes private të objektit multifunksional pranë Pallatit të Kongreseve”.

Fitues i kësaj gare u shpall një konsorcium i përbërë nga studioja prestigjoze “Herzog & de Meuron Basel Ltd”, e shoqëruar nga emra dhe kompani si Julian Beqiri, Marsela Demaj, Michel Desvigne (MDP), Gentian Shkurti, SUEB Industries sh.p.k., The Space Factory Ltd dhe “KLAR” sh.p.k.

​Për t’i hapur rrugë këtij projekti privat-publik, qeveria përdori të njëjtën strategji të sprovuar:

Shtator 2025: Përmes VKM-së Nr. 503, qeveria i kalon në pronësi AIC-së një sipërfaqe prej 4,760 m² truall publik (lulishtja rreth Pallatit të Kongreseve), e cila më parë administrohej nga Bashkia e Tiranës.

Nëntor 2025: Shpallet zyrtarisht gara e përshpejtuar, duke bërë fakt të kryer idenë e hedhur nga vetë Rama që në prill të atij viti për ndërtimin e kullave me Partneritet Publik-Privat (PPP) në këtë zonë.

Mbi këtë lulishte publike tani do të ngrihet një kullë me banesa, zyra, njësi tregtare dhe parkingje nëntokësore.

​Perandoria e Lejeve: Nga Lalëzi në Bulevardin e Ri

Lidhjet mes biznesmenit Beshiri dhe pushtetit duket se kapërcejnë ndasitë politike. Përmes influencës së familjes Berisha, Beshiri ka siguruar një sërë lejeve dhe statusesh favorizuese nga qeveria “Rama”:

Turizëm Strategjik: Tri leje ndërtimi për hotele në Himarë dhe statusi i “Investitorit Strategjik” për një kompleks gjigant vilash e pallatesh në Lalëz, shtrirë mbi 119 hektarë tokë shtetërore (ku 28 hektarë janë pyll pishash buzë detit).

Kulla 65-katëshe: Më 17 nëntor 2025, Beshiri siguroi lejen për një kullë masive prej 65 katesh mbi tokë dhe 6 katesh nëntokë në Bulevardin e Ri të Tiranës.

Pallati i Kongreseve: Projekti i fundit konfirmon se pas logos së “KLAR” sh.p.k., interesat e familjes Berisha janë shtrirë tashmë edhe në një nga zonat më të lakmuara dhe historike të kryeqytetit.

Një model i ricikluar i tjetërsimit të pronës publike

Projekti pranë Pallatit të Kongreseve nuk është një rast i izoluar, por kopje e pastër e një formule të suksesshme tjetërsimi të hapësirave publike që Edi Rama ka aplikuar në mbarë vendin.

Kjo skemë – ku prona publike “falet” në këmbim të një ndërhyrjeje estetike, ndërsa privati përfiton miliona euro përmes kullave – është përdorur më parë te Pallati i Sportit “Asllan Rusi” dhe Stadiumi “Selman Stërmasi”, te ​Shtëpia e Fëmijëve “Zyber Hallulli”  dhe Agjencia Telegrafike Shqiptare (ATSH), projekte të ngjashme me kulla, edhe rreth stadiumeve në Durrës, Vlorë dhe Korçë.

Në fund, bilanci mbetet i njëjtë. Qytetarët humbasin hapësira publike dhe identitetin urban, ndërsa oligarkia dhe politika ndajnë mes tyre katet e kullave të radhës.