Arrestohet në flagrancë një 45-vjeçar në Gjirokastër, pasi prishi qetësinë publike, duke vënë muzikë të lartë, pas mesnate, në lokalin e tij në zonën muzeale, si dhe kundërshtoi me forcë punonjësin e policisë që ndërhyri për të ndaluar ndotjen akustike.
Në kuadër të kontrolleve të pandërprera në të gjithë territorin e qarkut, ditën dhe natën, për të garantuar mbarëvajtjen e sezonit turistik 2023, specialistët e Seksionit për Hetimin e Krimeve të Komisariatit të Policisë Gjirokastër, kanë konstatuar se në lokalin në pronësi të shtetasit M. Sh., në zonën muzeale të qytetit, ishte vënë muzikë e lartë, pas mesnate, zhurmë e cila përbënte shqetësim për banorët dhe për turistët.
Menjëherë pas konstatimit, njëri nga punonjësit e policisë ka ndërhyrë me qëllim ndërprerjen e zhurmës.
Shtetasi M. Sh., 45 vjeç, banues në Gjirokastër, nuk ka pranuar ta ndalojë muzikën dhe ka kundërshtuar me forcë, punonjësin e Policisë që ai të mos kryente veprimet e mëtejshme procedurale. Ky shtetas u arrestua në flagrancë nga shërbimet e Policisë, për paligjshmëritë e kryera.
Në cilësinë e provës materiale u sekuestruan pajisje që gjeneronin muzikën.
p.k\dita
