Pjesë e kurrikulave mësimore në arsimin parauniversitar tashmë do të jetë edhe edukimi për sigurinë rrugore. Kështu, nxënësit e shkollave të arsimit të detyruar 9-vjeccar dhe ata të gjimnazeve gjatë procesit mësimor do të zhvillojnë edhe kapituj të veccantë mbi sigurinë rrugore.
Më konkretisht, programi synon të zhvillojë njohuritë teorike dhe aftësitë praktike të nxënësve në fushën e sigurisë rrugore, të edukojë një sjellje të shëndetshme e të sigurt në rrugë, si dhe të rrisë kapacitetet e mësuesve për t’i mundësuar ato në procesin mësimor.
Drejtoria e Përgjithshme e Shërbimeve të Transportit Rrugor dhe Ministria e Arsimit dhe e Sportit nënshkruan marrëveshjen e përbashkët për hartimin dhe zbatimin e unifikuar të kurrikulës së re të Edukimit për Sigurinë Rrugore në arsimin parauniversitar.
Parashikohet që në kurrikula mësimore të ketë kapituj të dedikuar mbi sigurinë rrugore e tekste të reja plotësisht në përputhje me praktikat evropiane në të gjitha shkollat, deri në 18 vjeç. Ndërkohë që përveç kurrikulave mësimore për nxënësit, do të sigurohen edhe materiale formuese e burimore në ndihmë të trajnimit të mësuesve të sistemit arsimor.
Marrëveshja e re do të sjellë risi në metodologji e didaktikë, orë digjitale mësimore dhe simulatorë, aplikacione online e aktivitete të konceptuara sipas grupmoshave.
“Ky bashkëpunim bazohet në ndryshimet e Kodit Rrugor, propozuar nga Ministria e Infrastrukturës dhe Energjisë, mbi unifikimin dhe homologimin e manualeve formuese, rolin e Drejtorisë së Përgjithshme të Shërbimeve të Transportit Rrugor, si edhe interesin strategjik për rritje sigurie rrugore dhe publike, me objektiv kulturën mbi trafikun dhe lëvizshmërinë e sigurt” sqarojnë autoritetet.
Synimi është përgatitja e individit si një përdorues rruge, mjeti, pasagjer, këmbësor, pedalues e drejtues mjeti, që në vegjëli sipas praktikave më të mira ndërkombëtare, për një realitet ku sot motorizimi i shoqërisë është dyfishuar nga viti 2013, duke shkuar në rreth 300 mjete për 1,000 banorë.
p.k\dita
