Nga Orgen Peci
Ish-kryeministri i Shqipërisë në vitet 1991-1992, Vilson Ahmeti, i cili në vitin 1993 u arrestua për çështjen e njohur si “Afera e 1.6 milionë dollarëve”, shfaqet si bashkëaksioner dhe ish-administrator i kompanisë së ndërtimit ALBANIAN INVESTMENT CONSTRUCTION (A.I.C) sh.p.k.
Kompania A.I.C e themeluar në vitin 2004 me një kapital fillestar prej 100 mijë lekësh, ka zgjeruar aktivitetin e saj në fushën e ndërtimit përmes disa projekteve madhore në Tiranë dhe rrethina, si dhe në bregdet.
Paralelisht me aktivitetin në ndërtim, emri i Vilson Ahmetit dhe i kompanisë A.I.C përmbahen në dosjen hetimore të Strukturës së Posaçme Kundër Korrupsionit dhe Krimit të Organizuar (SPAK) për aferën CEZ-DIA, çështje për të cilën ndodhet në paraburgim ish-presidenti Ilir Meta.
Projektet e ndërtimit dhe statusi i pronave
Gjatë viteve të fundit, kompania A.I.C ka marrë leje ndërtimi dhe ka zhvilluar disa projekte imobiliare. Kompania ka ndërtuar një godinë shumëkatëshe në zonën ndërmjet ish-Hotel Dajtit dhe Katedrales, mbi një sipërfaqe toke që më parë ka qenë në pronësi shtetërore e parashikuar për llogari të Gjykatës së Lartë.
Në qershor të vitit 2023, A.I.C ka marrë leje ndërtimi për një kompleks rezidencial në zonën e Farkës, ku përfshihen sipërfaqe tokash publike dhe private.
Kompania ka kryer ndërtime në zonën e Dajtit, në Rrugën “Ndre Mjeda” në Tiranë, si dhe një kompleks banimi 4-katësh në zonën e Ujit të Ftohtë në Vlorë.
Dokumentet e regjistrave tregtarë tregojnë se A.I.C ka kryer transaksione dhe investime në Caslano të Zvicrës, në bashkëpunim me kompaninë Shehu Architects Sagl me qendër në Lugano.
Sipas të dhënave të Anketa e Buxhetit të Familjeve dhe bilanceve zyrtare, ngritja e strukturave të tilla nga një kompani me kapital fillestar minimal ngre pyetje mbi burimin e financimit dhe procedurat e kalimit të pronësisë së trojeve, çështje që mbeten për t’u verifikuar nga organet ligjzbatuese.
Implikimi në dosjen hetimore CEZ-DIA
Në dosjen e hetimit të SPAK-ut për aferën CEZ-DIA, kompania A.I.C dhe ish-administratori i saj Vilson Ahmeti përmenden si përfitues të transaksioneve financiare nga kompania DIA e Kastriot Ismailajt.
Sipas dokumenteve hetimore, gjatë viteve 2010-2011, kompania DIA ka kaluar në llogarinë e A.I.C shuma të larta disa me përshkrimin “rikonstruksion zyrash”. Vilson Ahmeti ka deklaruar gjatë marrjes në pyetje se faturat kanë qenë të rregullta dhe se shërbimet për kompaninë DIA janë kryer realisht. Megjithatë, hetimi i SPAK-ut konkludon se punimet e deklaruara për rikonstruksion zyrash nuk janë kryer faktikisht.
Roli i Petrit Ahmetit dhe lidhjet me ERE-n e kompaninë DIA
Hetimet e organit të akuzës zgjerohen edhe te vëllai i Vilson Ahmetit, Petrit Ahmeti, i cili ka mbajtur detyrën e këshilltarit të Bordit të Entit Rregullator të Energjisë (ERE) dhe më pas kryetar i këtij institucioni.
Në vitin 2012, ERE mori vendim për uljen e çmimit me të cilin KESH i shiste energjinë kompanisë CEZ (nga 2.8 lekë/kWh në 2.2 lekë/kWh). Në dëshminë e dhënë për hetuesit, ish-drejtori ekzekutiv i kompanisë DIA, Elvis Mataj, ka deklaruar se Kastriot Ismailaj i ka dhënë 150 mijë euro Petrit Ahmetit në funksionin e tij si këshilltar, me qëllim ndikimin në uljen e këtij çmimi.
Regjistri Tregtar vërteton se Petrit Ahmeti ka qenë bashkëthemelues dhe aksioner me Kastriot Ismailajn në kompaninë ASSET sh.p.k. (NIPT: L01628004T).
Në maj të vitit 2018, Kontrolli i Lartë i Shtetit (KLSH) kallëzoi në prokurori Petrit Ahmetin me akuzën e shkaktimit të një dëmi prej 9 milionë eurosh në buxhetin e shtetit gjatë drejtimit të ERE-s, proces i cili u pushua më pas nga prokuroria.
Në dosjen e Arbitrazhit, ish-drejtori i CEZ në Shqipëri, Josef Hejsek, ka dëshmuar se në takimin e zhvilluar në zyrën e kryeministrit të atëhershëm Sali Berisha me Kastriot Ismailajn, ka qenë i pranishëm edhe Petrit Ahmeti.
Aktualisht, SPAK nuk ka ngritur akuza zyrtare ndaj Vilson apo Petrit Ahmetit në kuadër të këtij procedimi penal, ndërsa mbetet në vlerësim të Gjykatës Posaçme (GJKKO) nëse do të kërkohet zgjerimi i rrethit të personave nën hetim.
Materialet investigative të përdorura në këtë raportim janë kontribut i faqes Prapaskena
