Kush janë biznesmenët e huaj që paguajnë udhëtimet me avion privat të kryeministrit shqiptar?

Në fillim të këtij viti, kryeministri i Shqipërisë Edi Rama udhëtoi në Izrael me një avion privat, i shoqëruar nga bashkëshortja e tij dhe një delegacion i ngushtë, për të marrë pjesë në Konferencën Ndërkombëtare për Luftën kundër Antisemitizmit.

Përveç takimeve me udhëheqësit e Izraelit, pjesë e vizitës ishte dhe një fjalim që Edi Rama mbajti në Parlamentin e Izraelit, i njohur ndryshe si Knesset.

“Më duhet ta them që e kam të vështirë të besoj se e meritoj një vlerësim kaq të jashtëzakonshëm,” e hapi fjalën e tij kryeministri i Shqipërisë.

“E në qoftë se Mossad-i nuk ju ka informuar plotësisht, po ju informoj unë që po më dridhen gjunjët,” iu tha ai deputetëve izraelitë.

Në Shqipëri, njoftimet zyrtare të qeverisë, por edhe mediat pranë saj e përcollën fjalimin si historik. Por teksa qeveria propagandonte fuqishëm nderin e madh që iu bë Ramës, rrjeti investigative BIRN zbuloi se kryeministri shqiptar udhëtoi në Izrael me avionin privat të sekuestruar nga ish-miliarderi i kriptovalutave, Sam Bankman Fried, një sipërmarrës i dënuar për mashtrim dhe pastrim parash.

BIRN e pyeti zyrtarisht kryeministrin se kush e pagoi avionin luksoz, me të cilin ai fluturoi në Jerusalem. Por më kot.

“Udhëtimi në Izrael ka pasur edhe elemente të mirëkuptueshme sigurie të veçantë dhe transporti ka qenë pjesë e këtyre elementëve,” tha ai, nëpërmjet një zëdhënëseje. “Shpenzimet nuk janë mbuluar nga qeveria shqiptare,” u përgjigj Rama, pa specifikuar se kush i kishte mbuluar ato.

Qeveria e Izraelit gjithashtu nuk iu përgjigj një kërkese për koment nga BIRN nëse ishte ajo që e kishte paguar fluturimin e kryeministrit shqiptar për në Tel Aviv.

Por tashmë sekreti është zbuluar. Kapitali ka mësuar se avioni superlukzon Bombardier 500, me të cilin Edi Rama udhëtoi në Izrael dhe u kthye sërish në Shqipëri, u pagua nga Tzachi Nachmias, një biznesmen, pasuria e të cilit vlerësohet në 1.5 miliardë euro.

Mjafton vetëm fakti që kryeministri shqiptar pranon financime nga aktorë të huaj privatë për të qenë një skandal i madh, i cili duhet të vërë në lëvizje gjithë shtetin. Por në këtë rast ka edhe më shumë.

Lidhje biznesi

Tzachi Nachmias është një manjat me interesa në teknologjinë e informacionit, ndërtimin e Data Centerave dhe pasuritë e patundshme. Në disa prej kompanive të tij ai është ortak me Sani Sanilevich, një emër jo i panjohur në Shqipëri.

Zoti Sanilevitch është konsulli i nderit të Shqipërisë në Izrael. Kryeministri shqiptar ka qenë i ftuar në fermën e tij private në Izrael. Paralelisht Sanilevich është duke ndërtuar me shpejtësi një rrjet të madh interesash biznesi në Shqipëri. Ai është aksioner në bankën e parë dixhitale në Shqipëri. Po kështu, mediat në Izrael kanë bërë të ditur se Sanilevich është duke planifikuar ndërtimin e një spitali në Shqipëri, Data Centera si dhe resort bregdetar.

Nuk dihet nëse pjesë e investimeve të Sanilevich në Shqipëri është edhe ortaku i tij, që pagoi avionin e kryeministrit shqiptar. Por në Izrael, Sanilevich dhe Nachmias bëjnë biznes bashkë. Kompanitë Sanilevich Real Estate and Enterprises, të kontrolluara nga Sanilevich, dhe Effie Properties, të kontrolluara nga Nachmias, zotërojnë secila 50% të një projekti të madh pasurish të patundshme që gjeneron të ardhura në Neve Neeman Park në Hod Hasharon.

Lobimet okulte të kryeministrit janë duke dalë gradualisht në pah, teksa mediat në Izrael dhe ato në Shqipëri zbulojnë detaje hap pas hapi.

Kapital