Kuvendi i Shqipërisë do të mblidhet sot, më datë 13 shkurt, ora 17:00.
Seanca plenare do të zgjasë 12 orë dhe tema kryesore që do të diskutohet është dosja e ish-agjentit të FBI-së Charles McGonigal.
Opozita ka kërkuar debat me kryeministrit Edi Rama për takimet e tij me Mcgonigal, por mbetet për t’u parë nëse kreu i qeverisë do të paraqitet apo do të ‘abstenojë’ si në dy seancat e mëparshme.
Nga ana tjetër, numri i deputetëve të opozitës që do të jenë përballë Ramës në sallë, do të jetë shumë i paktë, kjo pasi tetë prej tyre janë përjashtuar për dhejtë ditë nga Kuvendi.
Vendimi është marrë vetëm tetë ditë më parë, ndaj rrjedhimisht nuk do të jenë sot në Kuvend. Ata janë: Luçiano Boçi, Ina Zhupa, Albana Vokshi, Luan Baçi, Tritan Shehu, Ervin Salianji, Gazment Bardhi dhe Bledion Nallbati.
Më herët nga Kuvendi u përjashtua dhe kryedemokrati Sali Berisha dhe deputetët Belind Këlliçi, Flamur Noka, Edmond Spaho dhe Edi Paloka, por 10-ditëshi i dënimit të tyre ka përfunduar, sot do të jenë në seancë për debatin me Ramën.
Paralelisht me Kuvendin, Berisha ka paralajmëruar një tjetër protestë.
Në përfundim të protestës së 11 shkurtit, kryedemokrati tha se të hënën, në momentin që do të nisë seanca plenare, ai dhe demokratët do të rrethojnë Kuvendin në shenjë revolte.
E hëna e 13 shkurtit është shpallur edhe Ditë Zie Kombëtare nga qeveria shqiptare, në shenjë solidarizimi për viktimat e tërmetit tragjik në Turqi e Siri.
j.l./ dita
