Në brezin e asteroidëve midis Marsit dhe Jupiterit, shtrihet një asteroid metalik tepër i rrallë, që vlen më shumë se e gjithë ekonomia globale.
Teleskopi Hubble na ka dhënë një vështrim më të afërt të objektit, i cili vlerësohet të jetë me vlerë 10 kuadrilion dollarë!
Një hulumtim i publikuar në revistën “The Planetary Science” shikon më thellë se kurrë në misteret e asteroidit Psyche, një nga objektet më masive të sistemit diellor në brezin asteroid rreth Marsit dhe Jupiterit, rreth 230 milionë milje larg nga Toka.
Diametri i këtij objekti shumë të çmuar kozmik është rreth 140 milje, ose afërsisht sa madhësia e Massachusetts (SHBA).
Shumica e asteroidëve janë bërë nga shkëmbi ose akulli. Por ky supozim rezulton i rremë në rastin e Psyche, ai është bërë nga një metal, ndoshta bërthama e mbetur e një planeti që nuk u formua kurrë plotësisht, kështu që u quajt “protoplanet”.
“Ne kemi vëzhguar meteoritë që janë bërë kryesisht prej metali, por Psyche mund të jetë unik, ndoshta i përbërë tërësisht nga hekuri dhe nikel”, tha autori kryesor Dr. Tracy Baker në një deklaratë.
“Toka ka një bërthamë metalike, një mantel dhe një kore. Është e mundur që Psyche po formohej si një protoplanet, por u përplas me një objekt tjetër në sistemin tonë diellor dhe humbi mantelin dhe koren”, shton ai.
NASA synon të dërgojë anijen pa pilot Psyche në një raketë Falcon Heavy të SpaceX për të hetuar asteroidin. Kjo do të jetë hera e parë që një mision do të vizitojë një trup tërësisht metalik. Në janar 2026, orbiteri do të arrijë asteroidin për ta hetuar atë për rreth dy vjet.
Kreu i projektit në Universitetin Shtetëror të Arizonës beson se vetëm hekuri i atyshëm kushton rreth 10,000 kuadrilion dollarë në tregun aktual.
