Letër e hapur Hulusi Hakos

 

 

I nderuari profesor Hulusi Hako!

Në pamundësi për të përdorur gazetën tonë “Kushtrim Brezash” sepse Sekretari i Përgjithshëm na e ka ndaluar, po ju drejtohemi nëpërmjet shtypit tjetër dhe protokollit. Është mosha juaj dhe besimi që kemi ende se Ju do reagoni drejt që na obligon t’iu drejtohemi me respekt.

Po ndjekim me shqetësim dhe keqardhje ngjarjet në forumet drejtuese të OVP të LANÇ-it. Kur para disa kohësh lexuam një sërë artikujsh të disa profesorëve të shquar në gazetën “Dita” u habitëm dhe nuk e kuptuam plotësisht shqetësimin e tyre.

Sot themi se kanë patur shumë të drejtë. Të nderuarve veteranë , pasardhës, profesorë, si Spartak Braho, Fatos Tarifa, Ksenofon Krisafi, Pëllumb Xhufi, Dorian Koçi etj, ju shprehim falënderimet tona që me prononcimet e tyre publike në gazetën “Dita” na bënë të shohim edhe pas kuintave, atje ku u ngjiz politika e kulisave.

Ndoshta pa ndërgjegje, Ju profesor, për mungesë informacioni, jeni bërë mburojë për një sërë shkeljesh statutore të një grupi destruktiv në krye të OVP të LANÇ-it.

Vendosja Juaj në pozicionin e kryetarit është e paligjshme për shkak se është bërë në kundërshtim të plotë me statutin e OVP. të LANÇ-it. Megjithëse vetë Statuti i organizatës ka mangësi që duken si të qëllimshme, momentet e zgjedhjeve të drejtuesve janë relativisht të qarta.

Në nenin 17 që i referohet Konferencës Kombëtare në pikën “ç”…statuti parashikon që në raste të veçanta zgjedhja e Kryetarit që është kompetencë e Konferencës Kombëtare mund të bëhet edhe nga Komiteti Kombëtar. Ky është edhe rasti që po diskutojmë.

Në kompetencat e Komitetit Kombëtar sipas nenit 18 të statutit, parashikohet si zgjedhja me dy a më shumë kandidatura edhe llojet e votimit (i hapur ose i fshehtë sipas kërkesës së kandidatëve). Fakti që ishin dy kandidatura presupozon votimin e fshehtë sepse jo vetëm që kandidati Bernard Zotaj por edhe tre nënkryetarët e shumica e anëtarëve të Komitetit Kombëtar të pranishëm në mbledhje e kërkuan me këmbëngulje por edhe sepse është pjesë e patjetërsueshme e procedurës zgjedhore. Nëse një nga kandidatët do të kishte pretendime për parregullsi do të duhet t’i drejtohej KOMISIONIT TË KONTROLL- REVIZIONIT ekzistenca e të cilit parashikohet nga neni 17 , pika “e”… Vetëm kështu votimi do kishte karakter demokratik dhe rezultati do të quhej i ligjshëm.

Si do të mund të punonte Komisioni i Kontroll-Revizionit (gjykata e organizatës) nëse s’do të kishte dokumentacionin përkatës ?

Si masa organizative paraprake do të duhet të ishin veç të tjerash edhe:

– krijimi i komisionit që do të drejtonte e menaxhonte votimin me dokumentacionin përkatës.

– në komision do të duhej të kishte përfaqësues të çdo kandidati dhe vendimet do të quheshin të vlefshme nëse firmoseshin nga kandidatët ose përfaqësuesit e tyre.

Komisioni i votimit do të duhet të administronte disa dokumente bazë të njohura në çdo rast zgjedhjeje.

1- Listën e pjesëmarrësve në zgjedhje(që vërteton kuorumin dhe identitetin personal nëpërmjet kartës së identitetit)

2- Fletët e votimit ku të jenë regjistruar të dy kandidatët.

3- Proces verbalin përkatës (pas numërimit të fletëve) për rezultatet e votimit firmosur nga të gjithë anëtarët e komisionit .

Kopje të dokumentacionit përfundimtar të krijuat gjatë procesit duhet t’i merte edhe çdo kandidat në mënyrë që të kishte mundësinë e ankimimit në Komisionin e Kontroll-Revizionit nëse do të kishte pretendime për paregullsi.

Këto masa organizative të domosdoshme që u kërkuan me këmbëngulje nga kandidati Bernard Zotaj , tre nënkryetarët dhe shumica absolute e anëtarëve të Komitetit Kombëtar jo vetëm nuk u zbatuan por procesi i votimit u sabotua nga drejtimi me arrogancë prej Sekretarit të Përgjithshëm, Veli Myftari.

Ai jo vetëm nuk zbatoi asnjë nga kërkesat statutore por me qëndrimin e tij arrogant prej autokrati nuk përfilli asnjë nga tre nënkryetarët e as kërkesat nga shumica e anëtarëve të Komitetit Kombëtar në sallë.

Ai, në kundërshtim të plotë me ligjin, angazhoi administratën që paguhet nga kuotat e anëtarësisë si në organizimin edhe në procesin e votimit e numërimit. Votimi i hapur u përsërit disa herë për shkak se nuk plotësoheshin aq vota sa i duheshin sekretarit për të realizuar planin e tij.

Sekretari ndërroi disa numërues sepse nuk po arrinin dot numrin e duhur derisa nisi të numëronte edhe vetë. Është për të qarë e për të qeshur kur kujton disa puthadorë që votonin me të dyja duart lart. Këto pamje groteske i ka pasqyruar me fotografi edhe vetë faqia e  komanduar prej tij “Kushtrim Brezash” në fejsbuk. Do mjaftonte vetëm kjo pamje për ta neglizhuar e përbuzur këtë farsë të organizuar e realizuar nga Sekretari i Përgjithshëm Veli Myftari dhe grupi i tij.

Dëshmitarë të shumtë okularë ishin dhe janë vetë anëtarët e komitetit që ishin të pranishëm.

Në këto kushte kur kandidatit pretendues të nderuarit Bernard Zotaj por edhe tre nën/kryetarëve ju ishte mohuar me qëllim

– e drejta për një proces të rregullt zgjedhor

– e drejta për votim të fshehtë

– e drejta për të krijuar komisionin e votimit

– e drejta për të patur dokumentacionin e prodhuar që do të mundësonte ankimimin në Komisionin e Kontroll-Revizionit

– e drejta për të pasqyruar në gazetën “Kushtrim Brezash” ( një gazetë që trajtohet si pronë private) të fushatës dhe i mendimeve e pretendimeve të çdo kandidati ç’mbetet për t’u bërë ?!

Kur demokracia zëvendësohet nga autokracia revolta është e ligjshme.

Duhet t’i nënshtrohemi manipulimit për interesa të errëta personale e të ulim kokën si dele të bindura apo duhet të gjejmë rrugët për rivendosjen e demokracisë së brendshme në organizatë..?!

Mund të jetë edhe më keq. Mund të krijohet  përshtypja se këto veprime janë bërë nga padija ose për arsye egosh personale . Jo . Tani nuk besojmë se është kështu.

Ju lutemi shihni ç’ka ndodhur me statutin! Ndërsa në nenin 17 parashikohet ekzistenca e Komisionit të Kontroll-Revizionit , në nenin 21 këtë komision e shndërrojnë befas në “Kontroll financiar” duke ia kufizuar objektin.

E kanë bërë gabimisht vallë ?! Tani mendojmë se jo. Komisioni i Kontroll-Revizionit nuk do duhet të ishte funksional pikërisht për të qenë vetë Ali vetë Kadi Sekretari i Përgjithshëm të cilit i pëlqen shumë t’i ketë kryetarët mbi 90 vjeç që t’i bëjë vetë të gjitha rolet duke i rezervuar vetes të drejtën për të qenë pushtet legjislativ, ekzekutiv dhe gjyqësor.

Po dëgjojmë andej-këtej edhe  “thashetheme” se :

– statuti është miratuar me firma të falsifikuara…

– komisioni i Kontroll-Revizionit nuk funksionon normalisht etj. etj…

– thuhet se kontrolli financiar ka gjetur shkelje të rënda në trajtimin e buxhetit të organizatës por ato nuk bëhen të njohura për forumet dhe anëtarësinë.  Pse vallë ?!

A duhet t’i lemë këto thashetheme rrugës për ta ndotur edhe më tej organizatën apo t’i trajtojmë në organet e zgjedhura për të shuar çdo dyshim për manipulime ?

Kjo të bën të mendosh se ky “krim elektoral” ndaj UNITETIT të organizatës sonë “Nderi i Kombit” është i qëllimshëm, i projektuar në kulisa antidemokratike dhe fshehtas anëtarësisë dhe forumeve. Kemi të bëjmë me një veprimtari të organizuar përçarëse ndaj organizatës sonë të nderuar. Kemi të bëjmë me një krim në zhvillim e sipër të cilin duhet t’a ndalojmë me çdo mjet demokratik.

Fakti që statuti i OVP…të LANÇ-it përshkohet nga  PAPËRCAKTUESHMËRIA , PAQARTËSIA dhe mungesa e MEKANIZMAVE SHBLLOKUES etj…tregojnë se kemi të bëjmë jo me paaftësi por me veprimtari të qëllimshme dhe të organizuar ndaj duhet t’a ndalojmë këtë proces kriminal në vazhdim.

Rezultatet e mbledhjes së datës 10.4.2023 duhet të shpallen nul përndryshe ajo do të mbetet një njollë e zezë në historikun e lavdishëm të organizatës sonë . Nëse kjo nuk ndodh ajo portë fisnike dikur e hapur ku veteranët , pasardhësit dhe miqtë tanë simpatizantë që po shtoheshin përditë gjenin veten do shndërohet në një derë të mbyllur që do mbajë brenda qelbin e plagës së majisur.

Profesor Hulusiu!

Shpresojmë të ndërgjegjësoheni për situatën e cila shkon drejt PËRÇARJES së OVP. të LANÇ-it dhe të ndihmoni në ruajtjen e unitetit të organizatës sonë duke u tërhequr nga një pozicion që ju është dhuruar me paramendim keqdashës duke ju implikuar ndoshta pa dashjen tuaj në një veprim destruktiv antistatutor dhe përçarës.

Me bindjen se nuk do ishte mirë që mbi emrin tuaj të deri sotëm të shtohet epiteti “PËRÇARËSI” siç po dëgjojmë t’ju cilësojnë në biseda të ndryshme anëtarësh ju urojmë jetë të gjatë e të qetë larg ndikimit të përçarësve të vërtetë.

Nënshkruar:

1- Pelivan Hysi  ( Anëtar i Kryesisë së Komitetit Kombëtar dhe Kryetar i Komitetit të V.P të LANÇ Tiranë.

2- Resmi Bregu ( zv/kryetar i Kom.të V.P.të LANÇ Tiranë dhe Kryetar i Këshillit Zonal nr 4.

3 – Shefki Velaj(Anëtar i  Kryesisë së Komitetit Kombëtar dhe Kryetar i Keshillit Zonal nr.3

4- Thoma Vaso (Kryetar i Këshillit Zonal nr.2)

5 – Oqeane Ziflo( N/ Kryetare e Këshillit Zonal nr .1)

6 – Valentina Postoli :  Anëtare e Komitetit Kombëtar dhe Sekretare e Këshillit zonal nr.5 ).

7 – Thoma Katro ( Kryetar i Këshillit zonal 5/1)

8- Luan Kula ( Kryetar i Këshillit Zonal- Astir).

9 – Mevlud   Skënderi ( Kryetar i Këshillit zonal nr.11).

10- Enver Hysa ( Kryetar i Këshillit zonal Shëngjergj)

11- Hysen Belba ( Kryetar i Këshillit Zonal Pezë)…

… si dhe një numër i konsiderueshëm anëtarësh të Komitetit Kombëtar dhe anëtarësh të OVP. të LANÇ-it të Tiranës…

Tiranë 16.4.2023