Kryeministrja italiane Giorgia Meloni pritet të udhëtojë drejt Parisit për një takim të rëndësishëm me presidentin francez Emmanuel Macron, ku do të diskutohet situata në Ngushticën e Hormuzit dhe mundësia e një misioni evropian në rajon. Takimi, i planifikuar për këtë të premte në Pallatin Élysée, pritet të zhvillohet gjithashtu në praninë e kryeministrit britanik Keir Starmer dhe kancelarit gjerman Friedrich Merz, megjithëse disa pjesëmarrës mund të lidhen vetëm përmes video-konferencës.
Pjesëmarrja e Melonit ende nuk është zyrtarizuar plotësisht, por burime nga Berlini kanë konfirmuar se Gjermania synon të jetë e pranishme, duke e bërë thuajse të sigurt zhvillimin e një samiti të nivelit të lartë mes katër vendeve kryesore evropiane, raporton gazeta italiane La Repubblica.
Takimi vjen në një moment delikat për kryeministren italiane, e cila ka pasur shpesh përplasje politike me Macron. Në sfond është edhe përkeqësimi i marrëdhënieve me presidentin amerikan Donald Trump, një zhvillim që duket se ka shtyrë Romën të afrohet më shumë me partnerët evropianë për një nga çështjet më të ndjeshme gjeopolitike të momentit.
Ngushtica e Hormuzit konsiderohet një pikë kritike për ekonomitë e Bashkimit Evropian, pasi çdo destabilizim në këtë zonë përbën kërcënim të drejtpërdrejtë për furnizimet energjetike. Në këtë kontekst, pjesëmarrja e Italisë në samitin e Parisit shihet si një sinjal i kujdesshëm drejt Uashingtonit, se ekzistojnë alternativa në qasjen strategjike të Romës, përtej linjës së deritanishme pro-amerikane.
Megjithatë, një mision i mundshëm evropian në Hormuz mbetet ende i paqartë. Diskutimet e para pritet të fokusohen në shkëmbimin e informacioneve dhe në sqarimin e planeve të propozuara nga Franca dhe Mbretëria e Bashkuar. Ndërkohë, Shtetet e Bashkuara kërkojnë një angazhim të menjëhershëm, ndërsa vendet evropiane këmbëngulin se një armëpushim i qëndrueshëm duhet të jetë prioritet.
Angazhimi konkret i Italisë do të përcaktohet në ditët në vijim dhe mund të shkojë përtej dërgimit të anijeve për pastrimin e minave detare. Franca po shqyrton mundësinë e riaktivizimit të një misioni të mëparshëm në zonë, duke kërkuar pjesëmarrjen e aleatëve për të garantuar sigurinë në Ngushticën e Hormuzit.
Ndërkohë, raportet me SHBA-në mbeten të ndërlikuara. Italia nuk mund të mohojë një marrëdhënie të cilësuar për vite si “speciale”, e cila kulmoi me pjesëmarrjen e Melonit në ceremoninë e inaugurimit në Uashington në janar 2025. Për këtë arsye, sinjalet ndaj Shtëpisë së Bardhë po jepen me kujdes.
Ministri i Jashtëm italian Antonio Tajani ka theksuar se nuk bëhet fjalë për një krizë, por për “dallime në qëndrime”, ndërsa lideri i Lega, Matteo Salvini ka ironizuar deklaratat e Trump për përfundimin e luftës. Nga ana e saj, Meloni ka bërë thirrje për ruajtjen e unitetit transatlantik gjatë një konference të përbashkët me presidentin ukrainas Volodymyr Zelensky.
Në këtë kuadër, nuk përjashtohet që në ditët në vijim të zhvillohet edhe një bisedë telefonike mes kryeministres italiane dhe presidentit amerikan, në përpjekje për të ulur tensionet dhe për të ruajtur balancat në marrëdhëniet ndërkombëtare.
j.l./ dita
