Gara për licencat e reja në arsim tashmë ka nisur. Kandidatët e arsimit fillor janë të parët që po i nënshtrohen provimit të shtetit, rezultatet pozitive të të cilit, janë vendimtare për sigurimin e lejes së ushtrimit të profesionit të mësuesit në këtë profil lëndor. Provimet për këtë profil do të vijojnë deri të premten e datës 14 prill.
Në vijim do të jenë kandidatët e diplomuar në gjuhët e huaja që do të vijojnë me dhënien e provimit të shtetit. Sipas kalendarit të shpallur nga Qendra e Shërbimeve të Arsimit, në datat 18, 19 dhe 20 prill provimi i licencimit do të zhvillohet për mësuesit e gjuhës angleze dhe asaj greke.
Për kandidatët e rinj të mësuesisë në lëndën e gjuhës shqipe dhe letërsisë provimi i shtetit do të zhvillohet për tre ditë me radhë, përkatësisht në datat 24-26 prill. Ndërsa në datat 27 dhe 28 prill, provimi do të zhvillohet për kandidatët gjuhës gjermane, asaj italiane, si dhe gjuhës frënge.
Dhënia e provimeve të shtetit për licencat e reja në arsim do të vijojë në data 2-5 maj, me kandidatët e matematikës, kimisë, matematikë-fizikës dhe gjeografisë.
Për mësuesit e edukimit fizik provimi i shtetit do të zhvillohet në datat 8-10 maj, për të vijuar me testimet e radhës në datat 11 deri me 23 maj me mësuesit e rinj të profileve histori, gjeografi, fizikë, shkenca sociale, arsim special. Kalendarin e detajuar me datat e provimeve për secilin profil e gjeni në vijim të shkrimit.
Autoritetet e Qendrës së Shërbimeve të Arsimit bëjnë me dije se provimet do të zhvillohen me 4 turne gjatë secilës ditë, çka do të thotë se mësuesit duhet të jenë të kujdesshëm dhe të paraqiten për të zhvilluar provimin vetëm në datën dhe orarin e përcaktuar specifikisht për ta. Në të kundërt nuk do të lejohen që t konkurrojnë në këtë sezon për licencën.
Në ditën e provimit duhet të bëni kujdes dhe të paraqiteni në Qendrën e Shërbimeve të Arsimit 30 minuta para orarit të përcaktuar për zhvillimin e testit, teksa duhet të jeni të pajisur me dokumentet e identifikimit, mandatin e pagesës së hyrjes në provim, si dhe stilolaps për nënshkrimin e deklaratës dhe rezultatit të provimi.
Për t’u ardhur në ndihmë kandidatëve që do të testohen në këtë sezon, kjo qendër ka detajuar edhe fondin e mijëra pyetjeve nga të cilat do të përzgjidhen edhe pyetjet që do të jenë pjesë e tezës së provimit të licencës. Në këto kushte, çdo kandidat mund të orientohet rreth përmbajtjes që do të ketë testi i licencës, duke u njohur me fondin e detajuar të pyetjeve që gjendet në faqen online të Qendrës së Shërbimeve të Arsimit.
p.k\dita
