Lionel Messi pritet të largohet nga Paris Saint Germain këtë verë, por në mbrëmjen e së shtunës la gjurmë të reja rekordesh. Fitoi kampionatin e 12-të në karrierë (10 me Barcelonën dhe 2 me PSG), teksa vetëm ish-madrileni Gento në vitet 60-të ka arritur 12 kampionate; shënoi golin e 806 të karrierës dhe bëhet golashënuesi rekord i 5 kampionateve më të mëdha në histori (kaloi Ronaldon me 805), i dha titullin PSG me golin që shënoi ndaj Strasbourg (1-1) teksa i duhej vetëm një pikë; si dhe mori trofeun e 43 në karrierë, duke kaluar edhe Dani Alvesh (që ndodhet në burg), duke u bërë futbollisti me më shumë trofe në histori dhe e fundit, ndodhet rrugës për topin e 8-të të artë (rekord absolut ky).
Kurse lajmin për largimin e ka bërë të ditur gazetari Fabrizio Romano në rrjetin e tij social duke thënë se sulmuesi anësor ka vendosur të mos rinovojë kontratën me francezët. Ngjarja më e fundit ku klubi e pezulloi për shkak të udhëtimit të tij në Arabinë Saudite për një fushatë komerciale duket se ka qenë vendimtare për vendimin e tij. Ndërkohë Messi ka disa mundësi të reja përsa i përket skuadrave që duan shërbimet e tij dhe nuk përjashtohet mundësia që të ndjekë karrierën e tij jashtë Europës. Al Hilal dhe Inter Miami janë gati t’i ofrojnë Messit një kontratë të majme. Gjithashtu edhe Barcelona kërkon rikthimin e tij. Në sezonin aktual në Francë, Messi ka luajtur 31 ndeshje dhe ka shënuar 16 gola duke dhuruar edhe 16 asistime për shokët e skuadrës.
