Lirimi i hapësirave publike, Rama: Po përgatitim një rregullore kombëtare

Kryeministri Edi Rama këtë të dielë më 10 gusht, në një videomesazh të gjatë të publikuar në Facebook ku u përgjigjet pyetjeve të qytetarëve, ka bërë me dije se po përgatitet një rregullore kombëtare lidhur me hapësirat publike, e cila do të përcaktojë me qartësi kufijtë mes interesit privat dhe hapësirës publike.

Rama theksoi se veprimet nuk përbëjnë një sulm ndaj sipërmarrjes, por janë pjesë e një procesi kombëtar për vendosjen e rregullave të qarta dhe të drejta për të gjithë.

“Bëhet fjalë për ndërtime të ç’montueshme dhe ka mirëkuptim të madh dhe po i çmontojnë. Ka edhe raste kur kjo nuk ndodh. Ky nuk është sulm ndaj aktivitetit sipërmarrës. Ne po përgatisim një rregullore kombëtare që do të vendosë qartë kufijtë, dhe do të japë qartë hapësirat e lirisë. Pra, do të ketë të gjithë hapësirën edhe për njësitë tregtare që të bëjnë jetën e tyre normalisht, por pa e kapërcyer kufirin që është i komunitetit”, tha Rama.

Rama shpjegoi se u detyrua të dilte të fliste në këtë videomesazh në rrjetet sociale, për shkak se i kishin bërë përshtypje reagimet e shumta të qytetarëve në seksionin e komenteve, lidhur me një postim të tijin të ditës së djeshme, mbi shembjen e një ndërtese në Vlorë.

“Arsyeja pse dola sot këtu sot është se po lexoja reagimet që më solli stafi im në këkjo faqe dhe më bënë shumë përshtypje reagimet në një postim të ditës së djeshme për shembjen e një ndërtese të paligjshme krejtësisht në bregdetin e bashkisë Vlorë. Është shumë interesant sepse në reagimet që lidhen me këto pastrimet, prishjet, ka një lajtmotiv që në rastin e këtij postimi ishte shumë herë më i theksuar dhe lajtmotivi është se pse u lanë të ngrihen këto dhe është një pyetje legjitime. Dhe pastaj vjen pjesa tjetër që fajin për ngritjen e një ngrehine mu buzë detit e ka ekskluzivisht shteti dhe kush i bën këto trajtohet si një subjekt totalisht i pafajshëm dhe madje madje kalohet në ekstrem duke folur për familje të ndershme që mezi mbajnë frymën gjallë dhe kriminalizohet tërësisht shteti. Njëlloj si të thuash ‘çfarë faji ka hajduti pse shteti nuk e kapi hajdutin?!”, tha Rama.

Kryeministri shtoi se teknologjia do të ndihmojë në fazën tjetër, që të mos ketë më fenomene të tilla.

“Në fund kam edhe elementin e teknologjisë. Shqipëria ka bërë progres të jashtëzakonshëm dhe para pak ditësh, një nga institutet më prestigjioze në botë të qeverisjes, të matjes së parametrave të qeverisjes, e përcaktoi Shqipërinë si një nga yjet në ngjitje të hapësirës evropiane së bashku me 4 vende të tjera për reformat dhe transformimin. Shqipëria është dicka krejt tjetër, e tregojnë shumë gjëra.Teknologjia do të na ndihmojë tani në këtë fazë, që siç kemi shkuar nga faza ku të gjithë ngrinin llaç e ngrinin mure, te faza kur kanë shkelje të ç’montueshme e më the e të thashë, te faza tjetër që s’do të ketë më. Teknologjia do të na çlirojë nga ky fenomen duke e reduktuar në maksimum.”, tha Rama.

Mes të tjerash, gjatë këtij videomesazhi, kryeministri Rama theksoi se “Rilindja urbane 2.0” për lirimin e hapësirave publike, nuk është thjesht një aksion veror por do të zgjasë me vite.

“Rilindja urbane 2.0 është program që do të vazhdojë 4 vjet dhe ky proces do të jetë konstant. Nuk është aksion apo sulm veror. Dhe ata që thonë se pse nuk e lije dot për në dimër, jo nuk e linim dot në dimër. Jo se kishim turistë nëpër këmbë, çështja e turistëve lidhet me dy apo tre gjera të tjera për të cilat do të llafosemi në shtator, duke filluar nga një pjesë e industrisë që nuk po mendon fare strategjikisht, por vetëm ‘kap ca të kapësh sot’, dhe po i bën gropën vetes nesër, pasi ato investime që po bën nuk do t’i shlyejë nëse sot vendos cmime të cilat do të hapin me shumë shpejtësi fjalën që është shumë shtrenjt në Shqipëri”, tha Rama duke shtuar se në vazhdim do të merren masa akoma më radikale edhe për plazhet.

j.l./ dita