Socialisti António José Seguro ka fituar raundin e parë të zgjedhjeve presidenciale në Portugali dhe do të përballet me kandidatin e ekstremit të djathtë, André Ventura, në raundin e dytë pas tri javësh.
Në zgjedhjet presidenciale të Portugalisë, Antonio José Seguro i Partisë Socialiste (PS) u rendit i pari të dielën me 31% të votave, sipas autoritetit zgjedhor CNE. Lideri i populistëve të djathtë, André Ventura, i cili ishte favorit në këtë raund, u rendit i dyti. Kandidati 43-vjeçar fitoi 23.5% të votave. Duke qenë se asnjë nga njëmbëdhjetë kandidatët nuk arriti shumicën absolute, do të nevojitet një raund i dytë.
Forcimi i shpejtë i populistëve të djathtë
Ventura ka pak shanse të zëvendësojë presidentin aktual konservator, Marcelo Rebelo de Sousa, i cili nuk mundi të kandidojë për rizgjedhje pas dy mandateve pesëvjeçare.
Megjithatë, rezultatet e forta konfirmojnë forcimin e shpejtë të populistëve të djathtë në Portugali. Vetëm gjashtë vjet pas themelimit të saj, partia e Venturës, Chega (“Mjaft më”), u bë partia e dytë më e votuar në Parlamentin e Lisbonës në maj të vitit të kaluar, pas aleancës konservatore të kryeministrit Luís Montenegro.
Për herë të parë që nga viti 1986, në zgjedhjet presidenciale të Portugalisë do të nevojitet një balotazh. Më shumë se 60% e të anketuarve thanë se nuk do të votonin për populistin e djathtë në një balotazh në asnjë rrethanë.
Në fjalimin e tij të fitores, Seguro u bëri thirrje “të gjithë demokratëve, të gjithë progresistëve dhe të gjithë humanistëve”. Ai i nxiti ata të “na bashkohen në mposhtjen e ekstremizmit dhe atyre që mbjellin urrejtje dhe përçarje midis popullit portugez”.
Kompetencat e presidentit
Kreu i shtetit ka relativisht shumë pushtet në këtë vend të BE. Presidenti mund të vendosë veto mbi ligjet, të shpërbëjë Parlamentin dhe të shpallë zgjedhje të reja. Rebelo de Sousa, president popullor që është i afërt me popullin, e shpërndau parlamentin dy herë gjatë mandatit të tij të dytë: në nëntor 2023, përballë akuzave për korrupsion kundër kryeministrit socialist António Costa, dhe në mars të vitit të kaluar, kundër konservatorit Montenegro.
dpa/dw
