Atentati në Don Bosko me një grua të vrarë dhe gjashtë të plagosur dyshohet të jetë kryer për motive hakmarrje ndaj vrasjeve të ndodhura në Tiranë, Fushë-Krujë, Laç e Lezhë, ku në shënjestër ishin njerëzit e Ervis Martinaj, të cilët u ekzekutuan njëri pas tjetrit përgjatë dy viteve të fundit.
Këto janë dyshimet e forta të Policisë që po heton për identifikimin e autorëve të masakrës së ndodhur mbrëmjen e së dielës, ku dy persona të armatosur me kallashnikov, qëlluan me breshëri mbi lokalin në pronësi të Fatjon Muratit dhe vëllezërve të tij që ndodhet në rrugën Anastas Shundi.
Policia po heton disa nga njerëzit që kanë patur miqësi dhe lidhje me mbretin e lojërave të fatit dhe prej zhdukjes pa gjurmë të Ervis Martinaj, ata ishin tërhequr dhe nuk shfaqeshin në publik. Ka dyshime të forta që ata janë riorganizuar gjatë këtyre muajve për të goditur në shenjë hakmarrje kundërshtarët e tyre.
Megjithatë, asnjëri prej këtyre personave të skeduar nuk janë shoqëruar dhe sipas sistemit TIMS të paktën njëri prej tyre rezulton jashtë, por hetuesit thonë se ai mund të jetë kthyer sërish në fundjavë nga ky mund të kalojë pa u regjistruar.
30 numra celulari janë vënë në përgjim, me qëllim zbardhjen e masakrës. Mësohet se shumica e ktyre kontakteve rezultojnë të fikura, por qëllimi është zbardhja e komunikimit mes tyre, në mënyrë që të zbardhen më shumë detaje mbi njerëzit që qëlluan me breshëri plumbash në drejtim të lokalin të Fatjon Muratit dhe vranë banakieren Mimoza Paja.
Makina e personave që kryen masakrën në lokalin e Fatjon Muratit është filmuar nga disa kamera sigurie në mbikalimin e Rinasit vetëm 10 minuta para se të ndodhte ngjarja. Sipas raportimeve, e gjithë rruga, nga Rinasi në drejtim të lokalit, zhvillimi i ngjarjes dhe kthimi i largimi sërish në drejtim të aeroportit, ka zgjatur vetëm 30 minuta. Kjo përllogaritje bëhet duke marrë parasysh se 30 minuta më vonë, e njëjta makinë, është kapur nga të njëjtat kamera, por në drejtim të kundërt, duke u larguar.
Hetuesit dyshojnë që lokali ka qenë i vëzhguar dhe autorët kanë pasur informacion te plotë për personat që ishin brenda. Brenda në lokal ka qenë edhe vëllai i Fatjon Muratit, Ervis Murati, ndërsa djali i xhaxhait të tij, është futur brenda ambienteve në momentin që ka është informuar për ngjarjen.
Ndërkohë, shënjestra e atentatit, Fatjon Murati, i cili do të duhet të ishte në ‘arrest shtëpie’ është arratisur dhe dyshimet janë se është larguar jashtë vendit. Ai është dyshuar me herët për atentatin me 3 të vrarë tek mbikalimi i Fushës-Krujës, ku viktimë mbeti Brilant Martinaj dhe dy miqtë e tij, Dikler Vata dhe Besmir Hoxha.
Në lokalin e Muratit, nga breshëria e armëve, humbi jetën banakierja Mimoza Paja, si dhe u plagos xhaxhai i Fatjon Muratit dhe 5 persona të tjerë, përfshirë dhe mbesën 10 vjeçe të viktimës. Për të rënë në gjurmët e autorëve policia po sekuestron kamerat e sigurisë, përgjatë rrugës që kanë ndjekur ekzekutorët nga Don Bosko deri në fshatin Likmetaj ku ata dogjën makinë që përdoren në atentat.
j.l./ dita
