Ka nisur në Ohër të Maqedonisë së Veriut samiti i “Ballkanit të Hapur”, ku marrin pjesë të gjitha vendet e rajonit me përjashtim të Kosovës që refuzon të jetë pjesëmarrëse.
Samiti është hapur nga lideri i vendit pritës, Kryeministri maqedonas, i cili foli për disa marrëveshje që do të nënshkruhen sot në këtë takim.
Kryeministri Edi Rama në fjalën e tij deklaroi sot se lufta në Ukrainë e bën Ballkanin e Hapur një domosdoshmëri edhe më të madhe.
Duke folur nga samiti i Ballkanit të Hapur, Rama tha se ”ne duhet të flasim shumë hapur dhe duhet ta ruajmë dhe ta fuqizojmë këtë karakteristikë të këtij rajoni pa pasur frikë se nga e folura hapur ne mund të kemi më shumë probleme se sa arsye për t’u bashkuar.”
Ai foli më tej për takimin me ambasadorin Cris Hill dhe theksoi se prania e tij në samit është inkurajuese.
“Në ndërkohë që presidenti i Serbisë e hoqi fjalimin e përgatitur, unë po shkruaja disa shënime jashtë fjalimit të përgatitur. Sepse besoj që ky është një rast për të folur për Ballkanin e Hapur si në Ballkanin e Hapur. Ne nuk mund të vijmë në një takim të Ballkanit të Hapur dhe të flasim siç jemi mësuar kur shkojmë në Bruksel. Ne duhet të flasim shumë hapur dhe duhet ta ruajmë dhe ta fuqizojmë këtë karakteristikë të këtij rajoni pa pasur frikë se nga e folura hapur ne mund të kemi më shumë probleme se sa arsye për t’u bashkuar.
Përkundrazi! Unë dua të kujtoj se ne mblidhemi sot për herë të parë në një samit të Ballkanit të Hapur pasi ka filluar lufta në Ukrainë dhe dua t’u them të gjithëve se ndryshe nga disa gabimisht mendojnë, lufta në Ukrainë e bën Ballkanin e hapur një domosdoshmëri edhe më të madhe se ç’ishte përpara se kjo luftë që i befasoi të gjithë të fillonte. Mbrëmë kam pasur mundësinë që të takoj këtu në vigjilje të Ballkanit të Hapur, ambasadorin Cris Hill, një njohës i thellë i rajonit, i cili ka shërbyer në Tiranë në kohë dramatike të transformimit nga diktatura në demokraci dhe sot shërben në Beograd. Unë besoj se ambasadori Cris Hill me praninë e tij këtu është një nga dëshmitarët më të besueshëm të domosdoshmërisë së Ballkanit të Hapur. Ai është këtu për të mbështetur Ballkanit të hapur. Për mua është shumë inkurajuese. Jam shumë i lumtur që sot këtu me ne janë edhe kryeministri i Malit të Zi, Dritani si dhe përfaqësuesi nga Bosnja, komisioneri Varhelyi, përfaqësuesi i KE drejtpërdrejt për rajonin tonë dhe miku ynë Gabriel Escobar i cili është i pranishëm përmes ekranit”, deklaroi Rama.
Rama në fjalën e tij është ndalur edhe tek Këshillimi Kombëtar i realizuar nga qeveria pak kohë më parë. I pari i qeverisë ka theksuar se nuk është pritur lufta në Ukrainë, për të ditur marrëdhënien speciale që ka mes Serbisë dhe Rusisë. Rama po ashtu u ndal edhe tek çështja e pazgjidhur mes Kosovës dhe Serbisë, por sipas tij kjo mosmarrëveshje zgjidhet vetëm duke u afruar. Si shembull konkret, Rama ka përmendur Francën me Gjermaninë, apo Japoninë dhe SHBA.
“Nuk kemi pritur luftën që mes Serbisë dhe Kosovës ka një histori të pazgjidhur. Por të ndenjurit me kurriz nga e ardhmja apo kthimit të syve nga e ardhmja ne kemi zgjedhur këtë të dytën. Por pa i mbyllur sytë tek problemet e pazgjidhura. Por kjo zgjidhet vetëm nëse ne afrohemi. SHBA kanë hedhur dy bomba në Japoni. Por një nga miqësit më të ngushta, është aleanca e SHBA me Japoninë, pas dy bombave atomike. Dhe urdhëroni ku është sot Japonia. Dhe nuk do ishte këtu Japonia nëse do qëndronte me kurriz nga SHBA dhe të uleshin në gjunjë para bombave. Ku janë sot Franca dhe Gjermania. Apo Izraeli me Shtetet e Bashkuara Arabe. Janë bashkë për të përfituar nga rruga e të ardhmes”, tha Rama.
Ai mes të tjerash kujtoi edhe kontratën e grurit me Serbinë, duke thënë se edhe pse në kohë krize, Serbia nuk e ndërpreu furnizimin me grurë për Shqipërinë.
“Ndalemi tek kontratat e grurit. Mes importimit nga Serbia në Shqipëri. Nuk u bllokuan siç fare mirë do ishin bllokuar nëse nuk do ishim në Ballkanin e hapur. Serbia ka marrë detyrime në reciprocitetin e kësaj. Mos është pak kjo? Apo duhet të mendojmë nëse nuk do merrnim dot grurit. Me çfarë do i ushqenim njerëzit që do u mungonte buka? Me konflikt apo me thirrje për tu futur në luftë?”, tha Rama.
Për sa i përket energjisë, Kryeministri Edi Rama bëri një parashikim negativ duke thënë se na pret një dimër që problem nuk do jetë çmimi por mungesa e energjisë.
“Apo me energjinë. Jemi të gjithë në teh të thikës. Në horizont është një dimër që nuk ka problem çmimin por nuk do ketë fare energji për ta blerë. Nuk kemi luksin për retorikë kur njerëzit duan energji. Këtu do jemi dhe njësoj si me grurin do provohet e vërteta se Ballkani i Hapur nuk është as i imi, as i Vauçiç dhe askujt tjetër, por i njerëzve. Është i fermerëve”, tha Rama.
j.l./ dita
Eshte i vetmi vend ku e pranojne ashtu sic eshte.
Ceshtje e Kosoves me Serbine i zgjidh akademija e barive!?
Teorikisht flitet se me kete marreveshje Shqiperia injoron Kosoven dhe zgjeron lidhjet me Serbine, por po te shikosh me vemendje vet kosovaret i vazhdojne lidhjet ekonomike me shume me Serbine se me asnje tjeter vend. Kjo duket hipokrizi: une bej si te dua me te, ndersa ti per hatrin tim kthei shpinen atij. Shqiptaret duhet te jene te ndergjegjshem se kjo nisma e Ballkanit te Hapur eshte shume e nevojeshme per te gjithe popujt e ketij rajoni dhe vecanerisht per kosovaret qe do te kene perfitimet me te medha.