Kryeministri Edi Rama njoftoi këtë të martë se Irani qëndron pas sulmit kibernetik të disa ditëve më parë mbi portalet qeveritare dhe se Shqipëria ndërpret marrëdhëniet diplomatike me këtë vend si kundërpërgjigje.
Po pse Irani ka sulmuar në këtë mënyrë Shqipërinë? Struan Stevenson, politikan i njohur europian dhe anëtar i Parlamentit Europian prej 17 vitesh, thotë se “irritimi i thellë i Iranit me Shqipërinë erdhi pas transferimit të mijëra anëtarëve të lëvizjes kryesore opozitare nga Iraku në Shqipëri, që do të thotë humbje e mundësisë për t’i asgjesuar ata”.
Kur MEK u vendos në Shqipëri, Agjencia Iraniane e Lajmeve, “ParsToday” paralajmëroi Shqipërinë se ndodhej “në prag lufte”. Kjo media e konsideroi pranimin e 3200 muxhahedinëve nga Shqipëria, të njëjtë me “vendosjen e izraelitëve në Palestinë në shekullin e kaluar”.
“Çështja është se muxhahidinët janë armiq të shtetit të Iranit. Me ardhjen e tyre në Tiranë fronti i luftës Iran – Europë është në mes të atdheut tonë të dashur. Ai komunitet së shpejti pritet të hapë mediat e veta e të intensifikojë aktivitetin brenda kufijve të mbrojtur nga shteti ynë. A i duhej ky risk Shqipërisë?”, shkruhej në versionin në gjuhën shqipe të “ParsToday”, duke folur si në emër të shqiptarëve.
Më tej, ky artikull e konsideron “shitje të politikanëve shqiptarë, Edi Ramës, llir Metës dhe Lulzim Bashës, te amerikanët” pranimin e muxhahedinëve.
“Ta kem mirë me Amerikën”, ëndrra dhe makthi i çdo politikani shqiptar i erdhi në shteg Edi Ramës dhe ky nuk e la t’i ikte”, shkruante kjo agjenci në shqip, duke shtuar madje se vetë SHBA “janë duke u afruar me Iranin, ashtu siç ka bërë edhe Bashkimi Europian, veprim që nuk po ndërmerret nga Tirana”.
i.b. / dita
