Një 27-vjeçar është arrestuar paraditen e sotme, pasi akuzohet se ka shantazhuar për t’i marrë para dy vajzave të mitura, 15 dhe 17 vjeçe, duke i gjobitur në këmbim të mospublikimit të videove dhe fotove intime. Policia bën me dije se Mario Rrançi i kërcënonte adoleshentet vazhdimisht, nëse nuk i jepnin paratë. Në këto rrethana, shoqet kanë kallëzuar të riun dhe policia e ka arrestuar nën akuzën e kanosjes për dhënie pasurie.
“Shërbimet e Komisariatit të Policisë Mallakastër, si rezultat i reagimit të menjëhershëm pas kallëzimit të marrë nga 2 adoleshente (15 dhe 17 vjeçe), se shantazhoheshin nga një shtetas, për t’i dhënë para, që ai të mos iu publikonte foto dhe video me përmbajtje personale, kanë kapur dhe arrestuar në flagrancë shtetasin M. Rr., 27 vjeç, banues në Ballsh, për veprën penale “shtrëngimi me anë të kanosjes ose dhunës për dhënie pasurie”, ka njoftuar policia. Dosja në ngarkim të të dyshuarit që mohoi akuzën, kaloi në Prokurori për hetime të mëtejshme.
