Shqipëria dhe Italia firmosën në Romë 16 marrëveshje dhe memorandume mirëkuptimi në fusha si siguria, mbrojtja, shëndetësia, energjia dhe zhvillimi ekonomik.
Gjysma e tyre, pra 8, janë në fushën e mbrojtjes, industrisë ushtarake dhe mbrojtjes civile.
Fincantieri, një nga grupet më të mëdha të ndërtimit të anijeve në botë, dhe KAYO, kompania shqiptare e prodhimit të armëve, nënshkruan një Memorandum Mirëkuptimi për të krijuar një ndërmarrje të përbashkët të dedikuar ndërtimit dhe mirëmbajtjes së anijeve luftarake në Shqipëri.
KAYO do të vërë në dispozicion kantierin e Pashalimanit në Vlorë dhe do të investojë në përmirësimin e infrastrukturës së tij, ndërsa Fincantieri do të investojë në modernizimin e procesit të prodhimit, do të ofrojë mbështetje operacionale, trajnim dhe ekspertizë inxhinierike. Marrëveshja parashikon krijimin e një ndërmarrjeje të përbashkët që do të veprojë si kontraktor kryesor për kontratat e ndërtimit dhe mirëmbajtjes së anijeve në tregun shqiptar dhe më gjerë.
Në fushën e mbrojtjes është firmosur një marrëveshje për transferimin falas të dy anijeve të patrullimit të klasit 400 të rojës bregdetare italiane.
Anijet patrulluese do të përdoren nga pala shqiptare për mbikëqyrje detare, kërkim-shpëtim dhe aktivitete të kontrollit të kufirit detar.
Për forcimin e kapaciteteve të Mbrojtjes Civile në Shqipëri do të përdoret granti prej 5 milionë euro që qeveria italiane ka dhënë.
U firmos gjithashtu marrëveshja 30 mln euro për mbrojtjen civile, për krijimin e të gjitha sistemeve të paralajmërimit të hershëm, si dhe për implementimin e numrit evropian 112, ku të gjithë qytetarët mund t’i referohen për emergjenca.
Në fushën e shëndetësisë është firmosur një marrëveshje për realizimin e projektit në mbështetje të neonatologjisë, në mbrojtje të fëmijëve dhe nënave. Bëhet fjalë për një grant për shërbimin e neonatologjisë, i cili do të përdoret kryesisht për trajnime.
Në fushën e kulturës është firmosur një memorandum mirëkuptimi mes Fondacionit “Maxi”, Muzeut Kombëtar të Arteve të Shekullit XXI në Itali, dhe Galerisë Kombëtare të Arteve. Ky bashkëpunim do të shoqërojë procesin e rihapjes së Galerisë Kombëtare të Arteve në Tiranë vitin e ardhshëm.
Me firmosjen e memorandumit të mirëkuptimit për bashkëpunimin mbi sigurinë kibernetike, palët do të organizojnë takime të rregullta të Politikave Kibernetike, të cilat do të shërbejnë si forume për shkëmbimin e pikëpamjeve dhe rishikimin e bashkëpunimit.
Memorandumi i mirëkuptimit kundër trafikut të drogës synon rritjen e bashkëpunimit operacional, lehtësimin e shkëmbimit të informacionit mbi grupet kriminale dhe forcimin e operacioneve dhe hetimeve të përbashkëta.
Dy marrëveshjet e tjera janë për bashkëpunim me Cassa Depositi e Prestiti, e cila do të ofrojë mbështetje financiare për rrjetin e transmetimit të energjisë elektrike në Shqipërinë veriore.
j.l./ dita
