Në konferencën e zhvilluar pak më herët për goditjen e dy grupeve kriminale, kreu policisë së Tiranës, Tonin Vocaj, është ndalur edhe tek ecuria e hetimeve për atentatin e ndodhur në “Don Bosko”, që i mori jetën 58 vjeçares Mimoza Paja. Lidhur me hetimet që po kryhen për këtë ngjarje, Vocaj tha se policia ka informacione mbi persona konkretë të përfshirë në këtë ngjarje, por për shkak të sekretit hetimor nuk ka dhënë detaje më shumë.
“Vazhdon të funksionojë një grup hetimor nën drejtimin e prokurorit, i cili do të marrë kohën e nevojshme. Policia ka informacione edhe për persona konkretë të përfshirë në këtë ngjarje, por për shkak të sekretit hetimor nuk mund të japim detaje, por kur të kemi përparime do ia bëjmë me dije mediave dhe publikut”, deklaroi Vocaj.
Ngjarja e rëndë ndodhi më 12 mars, në lokalin e Fatjon Muratit, ku humbi jetën banakierja Mimoza Paja, teksa u plagosën 5 persona të tjerë, ndërmjet tyre mbesa 10 vjeçare e viktimës, si dhe xhaxhai i Fatjon Muratit. Në fshatin Likmetaj ekzekutorët dogjën makinën që përdoren në atentat.
p.k\dita
