Mbi 26.600 maturantë në të gjithë vendin nisin këtë të martë provimet e Maturës Shtetërore 2026, ku sot ata do të testohen në gjuhën e huaj. Me anë të një postimi në Facebook, Ministrja e Arsimit Mirela Kumbaro, ka përcjellë një mesazh urimi për të gjithë maturantët, duke u uruar mbarësi dhe suksese në këtë proces të rëndësishëm.
Kumbaro thekson se për mbarëvajtjen dhe integritetin e këtij procesi, në të 144 qendrat e provimit janë angazhuar mbi 2 mijë mësues administratorë, 170 monitorues nga Ministria dhe 650 vlerësues që do të ndjekin me përkushtim çdo etapë.
“Sot është një ditë e veçantë dhe plot emocione për mbi 26,600 maturantët tanë, të cilët nisin rrugëtimin e provimeve të Maturës Shtetërore. Dua t’i uroj me gjithë zemër secilit prej jush mbarësi dhe shumë suksese. Për mbarëvajtjen dhe integritetin e këtij procesi, në të 144 qendrat e provimit janë angazhuar mbi 2 mijë mësues administratorë, 170 monitorues nga Ministria dhe 650 vlerësues që do të ndjekin me përkushtim çdo etapë. Paçi mbarësi dhe qoftë ky fillimi i një rruge të ndritur drejt auditorëve të universiteteve tona në profesionet që ju ëndërroni,” shkruan Kumbaro.
Nxënësit duhet të paraqiten në shkolla në orën 08:30, ndërsa provimi do të zhvillohet nga ora 10:00-12:00. Sipas njoftimit të publikuar më herët nga Ministria, ndalohen rreptësisht telefonat celularë dhe orët smart gjatë zhvillimit të testimit.
Nxënësit duhet të kenë me vete mjet identifikimi, kartë ID ose pasaportë, dy stilolapsa, vizore të vogël, makinë llogaritëse të thjeshtë, si dhe një shishe me ujë.
Për sa i përket veshjes, kërkohet uniforma e shkollës, ndërsa në mungesë të saj lejohet bluzë dhe xhinse. Procesi do të vijojë më 9 qershor me provimin e Gjuhës Shqipe dhe Letërsisë, më 16 qershor me Matematikën dhe do të përmbyllet më 23 qershor me provimin me zgjedhje.
j.l./ dita
