Shtetet e Bashkuara shprehën të mërkurën pikëllimin pas tërmetit shkatërrues në Afganistan dhe thanë se do të kërkonin mënyra për të ndihmuar, duke përfshirë bisedimet e mundshme me udhëheqësit talebanë.
“Shtetet e Bashkuara janë thellësisht të pikëlluara pas tërmetit shkatërrues që mori jetën e të paktën 1000 njerëzve në Afganistan,” tha Jake Sullivan, këshilltari i sigurisë kombëtare i Presidentit, Joe Biden.
“Presidenti Biden po monitoron zhvillimet dhe ka drejtuar USAID-in dhe partnerët e tjerë të qeverisë federale që të vlerësojnë opsionet e reagimit të SHBA-së për të ndihmuar ata që janë më të prekurit,” tha ai, duke iu referuar Agjencisë së SHBA-së për Zhvillim Ndërkombëtar.
Sekretari i Shtetit, Antony Blinken tha se Shtetet e Bashkuara janë në kontakt me grupet humanitare aktive në Afganistan që marrin mbështetje nga Uashingtoni.
“Partnerët humanitar të SHBA-së tashmë po përgjigjen, duke përfshirë edhe dërgimin e ekipeve mjekësore për të ndihmuar njerëzit e prekur dhe ne po vlerësojmë opsionet e tjera të reagimit”, tha Blinken në një deklaratë.
Tërmeti vjen gati një vit pasi Biden i dha fund përfshirjes ushtarake të SHBA-së në Afganistan, me kryengritësit talebanë që pushtuan shpejt vendin.
Shtetet e Bashkuara janë angazhuar në bisedime, por refuzuan të njohin qeverinë talebane, duke thënë se duan të shohin përparim në prioritetet kryesore të SHBA-së, duke përfshirë trajtimin e grave.
Zëdhënësi i Departamentit të Shtetit Ned Price tha se Shtetet e Bashkuara ishin të hapura për diskutim me talebanët, por nuk ishin në dijeni të ndonjë kërkese të menjëhershme nga qeveria de fakto.
“Unë imagjinoj se përgjigja humanitare ndaj tërmetit do të jetë një temë e bisedës midis zyrtarëve amerikanë dhe zyrtarëve talebanë në ditët në vijim,” u tha Price gazetarëve.
Tërmeti me magnitudë 5.9 goditi një pjesë të thellë dhe të thyer të Afganistanit lindor, një nga vendet më të varfra në botë. /REL
a.m/dita
