Mijëra pushues u janë drejtuar qendrave shëndetësore verore për të marrë kujdesin specializuar mjekësor për problematika të ndryshme që kanë hasur. Ministrja e Shëndetësisë dhe Mbrojtjes Sociale Ogerta Manastirliu, gjatë inspektimit të qendrës shëndetësore të Orikumit ka bërë me dije se mbi 4 mijë qytetarë u janë drejtuar këtyre qendrave.
“Janë rreth 4 mijë qytetarë, pushues, turistë të cilët kanë marrë shërbime në qendrat shëndetësore verore, 30% prej tyre janë pushues të huaj. Puna nuk ka ndaluar dhe gadishmëria jonë ka qenë maksimale sepse tashmë kemi përforcuar stafet edhe në qendrat ekzistuese, por edhe në qendrat që janë haour për sezonin turistik dhe janë rreth 170 mjekë, infermierë, punonjës dhe operatorë shërbimi, të dedikuar për të kryer këtë shërbim. Nga ana tjetër të gjithë spitalet tona rajonale janë të përforcuara dhe në gadishmëri”,- tha Ministrja Manastirliu.
Në të gjithë vendi janë hapur prej 15 qershorit, 30 qendra shëndetësore verore, ku ofrohet shërbim pa ndërprerje, për t’iu përgjigjur në kohë dhe me cilësi emergjencave shëndetësore gjatë sezonit turistik. Qendra Shëndetësore Orikum është një pikë referimi për sezonin turistik në këtë zonë, pasi ofron shërbim 24 orë. Pas rikonstruksionit, Qendra Shëndetësore Orikum ju shërben sipas standarteve më shumë se 11 mijë banorëve si edhe turistëve të shumtë gjatë sezonit turistik.
p.k\dita
