Mbledhja e qeverive, Rama pritet me ceremoni zyrtare nga Kovaçevski

Këtë të hënë të 14 nëntorit, në Shkup mbahet mbledhja e përbashkët e qeverisë së Shqipërisë dhe asaj të Maqedonisë së Veriut.

Rama është pritur me ceremoni zyrtare në shkup, teksa ka publikuar edhe pamjet në Facebook.

Kryeministri Edi Rama tha se në këtë mbledhje do të finalizohen disa marrëveshje e memorandume ndërqeveritare.

Rama publikoi më parë një foto nga Aeroporti i Shkupit ku ishte pritur prej Artan Grubit, zv.Kryeministri i Maqedonisë së Veriut.

“Aeroporti i Shkupit – Me Artan Grubin, zv.Kryeministrin e Maqedonisë së Veriut, për të nisur një ditë të mirë pune e marrëveshjesh që na afrojnë dhe na forcojnë edhe më shumë”, shkruan Rama.

Pak para orës 10:00, Rama u prit me ceremoni zyrtare nga Kryeministri i Republikës së Maqedonisë së Veriut.

Axhenda:

Sipas axhendës, kyeministri i Shqipërisë, Edi Rama, do të pritet me një ceremoni shtetërore nga kryeministri i Maqedonisë së Veriut, Dimitar Kovaçevski në orën 10:30.

Ndërsa në orën 10:45 do të zhvillohet një takim kokë më kokë mes dy kryeministrave, dhe do të vijohet më pas me hapjen e sesionit plenar të mbledhjes së dy qeverive në orën 11:00.

Fjalën hyrëse në mbledhjen e përbashkët të dy qeverive do e kenë kryeministrat dhe më pas do të vijohet me diskutimet e hapura për çështjet që pritet të trajtohen.

Ndërsa konferenca e përbashkët për shtyp do të jetë në orën 13:00 për të mbyllur vizitën dhe më pas në orën 14:10 pritet të vijohet me shkrepjen e fotografive të përbashkëta.

j.l./ dita