Policia e Durrësit ka vënë në pranga tre të rinj, si bashkautorë për kultivim dhe shitje në doza të cannabis sativës.
Autoritetet bëjnë me dije se tre shtetasit janë kapur në flagrancë pranë vendit ku kishin kultivuar bimët narkotike.
Konkretisht bëhet fjalë për 70 bimë narkotike cannabis sativa, të cilat janë asgjësuar nëpërmjet djegies, teksa është sekuestruar një sasi e kësaj lënde narkotike e ndarë në doza.
Specialistët e Seksionit për Hetimin e Krimeve të Postës së Policisë Manzë, në bashkëpunim me shërbimet e Drejtorisë Vendore të Policisë Durrës, në vazhdën e operacioneve kundër krimeve në fushën e narkotikëve, si dhe me mbështetjen e inteligjencës policore, kanë organizuar dhe finalizuar operacionin policor antidrogë të koduar “Ishmi”, si rezultat i të cilit u vunë në pranga shtetasit: D. L., 21 vjeç, E. L., 26 vjeç (kushërinj) dhe K. D., 21 vjeç, të tre banues në Mamurras.
Këta 3 shtetas u kapën në flagrancë në fshatin Ishëm, pranë vendit ku kishin kultivuar 70 bimë të dyshuara narkotike cannabis sativa. Gjatë kontrolleve, këtyre shtetasve iu gjet një sasi lënde e dyshuar narkotike cannabis sativa e ndarë në disa doza të gatshme për shitje.
Bimët narkotike u asgjësuan nëpërmjet djegies, ndërsa dozat e lëndës narkotike u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Parë të Juridiksionit të Përgjithshëm Durrës, për veprime të mëtejshme.
p.k\dita
