Në intervistën televizive, zyrtari i lartë amerikan, Gabriel Escobar, u pyet dhe për ccështjen “McGonigal”, për të cilën tha se nuk mund të flasë shumë pasi është ende nën hetim.
Por, ai deklaroi se marrëdhëniet mes Shqipërisë dhe Amerikës janë në nivelet më të mira që kanë qenë ndonjëherë, edhe pse theksoi se marrëdhënia është me popullin dhe jo partitë ose personat.
Sa i takon investimeve strategjike, Ecobar u shpreh se ka një dialog të hapur me qeverinë tonë dhe të gjitha qeveritë e rajonit se si duhet të trajtohet ky lloj investimi, qoftë ai kinez apo rus.
“Marrëdhënia mes Shteteve të Bashkuara dhe Shqipërisë është me popullin e Shqipërisë, me institucionet, jo me një parti dhe jo me një individ. Thënë kështu, do të thoja se marrëdhënia jonë me Shqipërinë është më e mira që kemi pasur ndonjëherë.
Mendoj se të gjitha vendet e rajonit, në të gjitha vendet e Europës, në fakt duhet të kenë njëfarë kontrolli të investimeve. Dhe ky ka qenë një diskutim i hapur me të gjithë partnerët tanë.
Mendoj se të gjithë i kuptojnë rreziqet e pastrimit të parave, rreziqet e ndikimit keqdashës rus dhe do të thoja se ne kemi një dialog të hapur me qeverinë, këtë qeveri dhe të gjitha qeveritë e rajonit se si duhet të trajtojmë atë lloj investimi, qoftë ai kinez apo rus dhe si e trajtojmë ne së bashku”, tha zyrtari amerikan Escobar.
m.b./dita
