Rama flet në Paris për protestat në Tiranë: Filluan prej Kushnerit, pastaj mbeti një grup i vogël i dhunshëm

U zhvillua pasditen e sotme Forumi i Paqes në Musée de l’Homme në Paris, ku i pranishëm është dhe kryeministri i Shqipërisë Edi Rama, sipas të cilit vendi ynë ka ecur me hapa mjaft të mira drejt BE-së.

Prezantuesja e forumit e pyeti Ramën rreth protestës së të rinjve që prej muajsh kanë mbushur rrugët e Tiranës. Rama tha se në fillim fare, numri i protestuesve ka qenë më i lartë dhe njerëzit kanë qenë të qartë me kërkesat e tyre, ndërsa së fundmi numri i pjesëmarrësve ka qenë në rënie, ndërsa protesta është shndërruar në kompleksitet pasi kërkesat e qytetarëve lidhen me të gjitha fushat duke i shkaktuar, sipas tij, paqartësi.

“Në fillim pati një numër mjaft të madh njerëzish që vinin nga të gjitha fushat e jetës dhe shprehnin shqetësime të cilat erdhën si rrjedhojë e projektit të famshëm ose famëkeq që lidhet me Jared Kushner. Ishte si një lloj shamije apo flamuri i keq që nxiti zemërimin. Nga kjo pastaj mbeti një numër shumë i vogël protestuesish që më vonë e përshkallëzuan në dhunë e nuk është e pranueshme dhe nuk ka të bëjë aspak me atë që ishte në fillim.

Ka protestë në mbarë Europën që do e cilësoja si përplasje mes botës reale dhe sociale. Mendoj se kudo dhe kurdo ka një protestë për arsye që duhen reflektuar dhe menduar. Sfondi i kësaj proteste është komplekse, ka një mori gjërash që janë si një tenxhere që zien gjithcka, nga shqetësimet e përgjithshme në mjedis, gjepura antisemite të nxitura nga armiqtë”, tha Rama.