Një vit më parë në përvjetorin e 12-të të 21 janarit, u publikua një audio- regjistrim. Ai provon se vrasjet e 21 janarit janë bërë me urdhër dhe jo “nga pakujdesia” apo “me rikoshetë” siç ka konkluduar hetimi dhe gjykimi i tyre i mëparshëm.
Materiali i bujshëm u bë publik nga gazetari i kronikës Artan Hoxha, i cili tha se e ka dorëzuar tashmë në SPAK dhe në familjen e njërit prej viktimave.
Materiali përmban bisedat mes kreut të Gardës dhe vartësve në momentin që është hapur zjarr mbi protestuesit. Kodi për të hapur zjarr në trup ka qenë “ta ta ta, gjakos”.
SPAK nuk e pranoi si material.
PJESË NGA PËRGJIMI:
Ndrea Prendi: Të mbahen armët në dorë gati për zjarr… Të mbahen armët në dorë gati për zjarr. Kur të them unë, në trup..
Ndrea Prendi: Artan Dëgjon? Artan dëgjon.
Artan Hoxha: Dëgjoj, dëgjoj
Ndrea Prendi: …do hapet zjarr luftarak
Artan Hoxha: Kuptova, kuptova.
Ndrea Prendi: ky është urdhri! Dashamir. Dëgjuat?
Ndrea Prendi: Alfred, (Alfred Ahmetcenaj) ta ta ta, gjakos! (urdhër për të vrarë)
(Dëgjohen të shtënat tek e tek… Pauzë. Sërish dëgjohen 8 shtëna radhazi tek e tek)
“Është një regjistrim audio. Tregon që vrasjet janë bërë me urdhër. Serverat u fshinë, procesverbalet u fshinë, nuk u la më asnjë gjurmë, për të fshehur faktin se vrasjet ishin kryer me urdhër.
Më në fund pas 12 vitesh, mu dha mundësia të kem një provë që dëshmon se vrasjet janë bërë me urdhër dhe oficerët kanë qëlluar me urdhër. Ky material që është siguruar pas një kohe kaq të gjatë jep mundësinë që të gjenden përgjegjësit dhe t’i qetësojnë familjarët.
Ndrea Prendi këtu flet me vartësit e tij. Ka qenë kanal i veçantë në Radio. Në këtë kanal ka qene edhe drejtori i përgjithshëm i Policisë dhe drejtori i Tiranës, por dëgjohet edhe ministri (Basha).
Materialin nuk e kemi nxjerrë me audio që të mos e humbë vlerën për të qenë provë e vlefshme për SPAK-un.
Duam të dalë vetëm e vërteta për 21 Janarin sepse është krim shtetëror. Kishim pamjet, por nuk kishim zërin, tani lidhet audio me pamjet dhe kuptojmë si janë vrarë qytetarët.
Ky material është regjistruar nga aleatët tanë dhe kur dëgjoj këta “non grata-t” që kërkojnë prova më vjen të qesh.
Kam njoftuar familjen e Aleks Nikës, sepse para dy vitesh dikush i ka shkuar dhe i ka çuar fotografinë e një oficeri dhe i ka thënë ky e vrarë. I kam thënë që të mos ngutet. Xhaxhai i Aleks Nikës e ka dëgjuar këtë përgjim” – tha gazetari Hoxha.
o.j/dita