Tre muaj pas sulmit terrorist në Banjskë të Kosovës, i kërkuari nga Interpoli si organizator dhe pjesëmarrës në ngjarje, Milan Radojiçiç, festoi Vitin e Ri në liri. Mediat në Kosovë raportojnë se në ditën e 1 janarit të këtij viti, Danilo Vuçiç, djali i presidentit serb, e ka festuar Vitin e Ri së bashku me udhëheqësit e grupit terrorist, Milan Radojiçiç dhe Zvonko Veselinoviç.
Kjo festë është mbajtur në lokalin e njohur të quajtur “Hani Bani’’ në Kopaunik. Në këtë festë i pranishëm ishte edhe Danijell Gjukiç, një prej pjesëmarrësve në sulmin terrorist në Banjskë, si dhe shok i afërt i Danilo Vuçiçit.
Kosova vazhdimisht ka paraqitur fakte e dëshmi të lidhjes së aktit terrorist të 24 shtatorit në Banjskë me shtetin e Serbisë, ndonëse këta të fundit janë përpjekur në vazhdimësi ta mohojnë. Edhe në konferencën e fundit për media të kryeministrit Kurti dhe ministri të MPB-së, Sveçla, në njërën prej foto-dëshmive shihej djali i presidentit të Serbisë, Danilo Vuçiç, me një prej pjesëmarrësve të sulmit të 24 shtatorit.
Për sulmin e 24 shtatorit u fol të martën edhe në parlamentin britanik. Para komisionit për Punë të Jashtme raportoi sekretari Cameron pas vizitës në Kosovë, ku ndër të tjera tha se sulmi i Banjskës ishte shumë i rrezikshëm dhe se mund të përfundonte edhe më keq. Deputetja britanike, Alicia Kearns, ka deklaruar se edhe një vend tjetër është duke i kryer hetimet për sulmin terrorist në Banjskë, por që nuk po i bën publike të gjeturat.
Deputetja shtoi se NATO-ja nuk e mori parasysh shqetësimin e saj që tha vitin e kaluar se po kontrabandohen armë në Kosovë, të cilat po vendosen në kisha. Kearns tha se BE dhe SHBA duhet të dalin me përgjigje për Banjskën, meqë kanë vendosur masa ndaj Kosovës. / RTK
j.l./ dita
