Mediat turke kanë dhënë detaje në lidhje me arrestimin e ‘bossi’-t të kriptomonedhave Faruk Fatih Ozer.
Në artikull shkruhet se Turqia e ka marrë vesh lajmin e arrestimit të Ozer nga Ministria e Brendshme në Shqipëri, drejtuar nga Bledi Çuçi.
“Ministri i Punëve të Brendshme i Republikës së Shqipërisë, Bledar Çuçi, ka njoftuar sot në mëngjes ministrin e Brendshëm Süleyman Soylu se themeluesi i Thodex, i arratisuri Faruk Fatih Özer, i cili ishte në kërkim është arrestuar. Me ‘alarm të kuq’, u kap në Vlorë në Shqipëri dhe identiteti i tij u konfirmua nga rezultatet biometrike”, thuhet në mediat që kanë publikuar dhe foton nga momenti i arrestimit të Ozer.
Mediat turke kanë publikuar edhe një foto të Faruk Ozer, i cili është transformuar tërësisht, nëse e krahasojmë më fotot e mëparshme dhe videot ku ia prononcohej si CEO i kompanisë Thodex.
Faruk Ozer është vënë në pranga një vit e gjysmë pas shpalljes së tij në kërkim ndërkombëtar. Boss-i i kriptomonedhave turke akuzohet se përmes kompanisë së tij, Thodex, mashtroi mijëra turq që kanë investuar paratë e tyre, rreth 2 miliardë dollarë në monedhat virtuale.
Më pas, ai shpalli falimentin e kompanisë, bëri mbylljen me ndihmën e motrës së tij dhe u arratis drejt Shqipërisë me 2 miliardë dollarë cash.
Në dosjen hetimore të publikuar nga mediat turke, Özer akuzohet për “krijim dhe drejtimi të një organizate me qëllim të kryerjes së krimeve”, “mashtrimi duke përdorur sistemet e informacionit, bankat ose institucionet e kreditit si mjete” dhe “tregtim ose menaxhim i kompanive”, ndërsa kërkohet për grupin e tij dënimi maksimal.
j.l./ dita
