Ish-kancelarja gjermane Angela Merkel deklaroi se largimi i saj nga detyra mund të ketë kontribuar në vendimin e presidentit rus (Vladimir Putin – AP) për të sulmuar Ukrainën.
Lajmi u bë i ditur nga botimi hanoverian i Redaktionsnetzwerk Deutschland, duke cituar intervistën e parë të Merkel-it pas largimit nga Kancelaria gjermane.
“Largimi im mund të ketë qenë një kontribut, siç janë zgjedhjet në Francë, tërheqja e trupave nga Afganistani dhe stanjacioni i zbatimit të Marrëveshjes së Minsk-ut”, u shpreh fillimisht Merkel.
Sipas fjalëve të saj, ish-kancelarja nga radhët e CDU-së, u përpoq vitin e kaluar të bisedonte me Vladimir Putin-in.
Kjo, për një rend të ri të sigurisë evropiane dhe e sheh arsyen e dështimit në trazirat në Perëndim në atë kohë.
“Nga njëra anë, Putin nuk ishte më gati për një samit të stilit të Normandisë. Nga ana tjetër, nuk arrita të krijoj një format shtesë diskutimi evropiano-rus për një rend evropian të sigurisë krahas formatit të Normandisë”, shtoi Merkel në një intervistë për rrjetin editorial të Gjermanisë (RND).
Ajo nuk përjashtoi mundësinë për të ndërmjetësuar në konflikt në një datë të mëvonshme. Kur u pyet nëse do të ishte në dispozicion, ajo u përgjigj: “Kjo pyetje nuk po bëhet aktualisht”.
Merkel pranoi edhe pafuqinë e saj në fund të mandatit të saj.
“Ishte e qartë se nuk do të isha në detyrë shumë më gjatë, dhe kështu më duhet thjesht të deklaroj se përpjekjet e ndryshme në vitin e kaluar nuk kanë pasur asnjë efekt”, nënvizoi ish-kancelarja.
Përsa i përket sistemit të sigurisë evropiane, Lufta e Ftohtë nuk është kapërcyer, theksoi ajo.
Duhet ta marrim seriozisht Putinin, paralajmëroi Merkel.
Sipas saj, sulmi i tij brutal është një pikë kthese në historinë evropiane të pasluftës që do të ketë pasoja për shumë vite në vijim.
Ajo mbështeti sakaq kursin e pasuesit të saj Olaf Scholz.
“Kjo është arsyeja pse unë mendoj se është e drejtë që Perëndimi po punon për ekzistencën e Ukrainës pa u bërë pjesë e konfliktit të drejtpërdrejtë ushtarak”, deklaroi në përmbyllje Angela Merkel.
a.m/dita
