Prokuroria e Asturias në Spanjë ka kërkuar dënimin e dy të pandehurve për një përleshje të ndodhur janarin e kaluar, në Shërbimin e Urgjencës të Spitalit Qendror Universitar (HUCA). Për njërin prej tyre, subjekti kërkon katër vite burg, për veprën penale të plagosjes me armë, ose me mjete të rrezikshme, të rënduar. Për tjetrin, kërkon gjobë për krimin e plagosjes. Gjykimi i shpejtë tashmë është zhvilluar këtë të premte, më 14 prill, në Gjykatën Penale numër 2 të Oviedos, në orën 09:30. Më konkretisht, për të pandehurin e parë kërkon dënim me katër vjet burg dhe përjashtim të veçantë për ushtrimin e së drejtës së votës pasive gjatë kohës së dënimit. I pandehuri i dytë, gjobë 12 muaj me 15 euro ditore, me përgjegjësi plotësuese personale në rast mospagese.
Por cili është shkaku?
Prokurori Publik pohon se rreth orës 14:00, të datës 19 janar 2023, dy të pandehurit kanë shkuar në sallën e pritjes të zonës së urgjencës Asturias. Secili shkoi më vete për të pyetur për statusin e një gruaje, e cila kishte pësuar një aksident trafiku në Oviedo. Dhe për çudi u zbulua se të dy pretendonin se kishin një lidhje intime me pacienten. Pasi secili prej tyre mësoi për marrëdhënien që tjetri pretendonte se kishte me atë grua, nuk ka pasur më vend për arsye, por për një krim pasioni në rrethana xhelozie. Njëri nga të pandehurit e ka goditur disa herë të pandehurin tjetër me sende të forta dhe armë të ftohta, teksa në vetëmbrojtje ai i është përgjigjur dhe përfundimisht të tre dashorët u bënë ‘bujtës’ të spitalit në fjalë (duke llogaritur edhe sebepin e sherrit).
