Bëhet fjalë për Spartak Poçin, i cili në 1999 ishte ministër i Rendit Publik. Ai shkoi për vizitë zyrtare në Greqi, së bashku me një delegacion. Megjithëse udhëtimi me makinë nga Tirana në Athinë zgjat rreth nëntë orë, u vendos që të udhëtohej me automjet. Në këtë rast, bëhej fjalë për një Mercedes S 350 (W140).
Në një pikë kontrolli gjatë hyrjes në Greqi, doganierët nisën të kishin dyshime për Mercedesin me të cilin udhëtonte ministri i brendshëm i Shqipërisë. Ata dyshonin se bëhej fjalë për një makinë të vjedhur. Për të shmangur një konflikt ndërkombëtar, e lejuan Poçin të vazhdonte rrugën, por njoftuan ministrin grek të Punëve të Brendshme.
Ndërsa Poçi mundi të vazhdonte vizitën e tij zyrtare, autoritetet greke vijuan hetimet për të zbuluar se nga vinte saktësisht Mercedesi i zi.
Hetimet sollën konfirmimin e pakëndshëm: Mercedesi me të cilin ministri shqiptar kishte udhëtuar drejt Greqisë rezultoi automjet i vjedhur. Me ndihmën e Interpolit u përcaktua se makina ishte vjedhur në Itali dhe më pas kishte përfunduar në Shqipëri, ku ishin ndryshuar numrat e motorit dhe të shasisë.
Për këtë arsye, automjeti u sekuestrua. Poçi nuk bëri kundërshtime dhe vazhdoi vizitën me një makinë që iu vu në dispozicion nga homologu i tij grek. Për kthimin në Shqipëri, ai udhëtoi me avion.
Ajo që e bëri situatën edhe më të sikletshme ishte fakti se, gjatë vizitës, ai kishte diskutuar pikërisht me palën greke për kontrolle më të rrepta në kufi.
Historia u pasqyrua pak më vonë edhe në mediat ndërkombëtare.
Ajo u botua në një libër kujtimesh të një oficeri të lartë të policisë greke dhe dje është ripublikuar në emisionin e BBC, Top Gear.
d.x. / dita
