Kryeministri Edi Rama ndau sot një video promovuese të ndeshjes miqësore mes kampionëve të Shqipërisë, “Partizanit” dhe “Romës” që do të zhvillohet nesër në orën 20:00 në stadiumin “Air Albania” në Tiranë.
“Nesër mbrëma All is Special. Air Albania Stadium 20:00”, shkruan Rama në rrjetet sociale, duke iu referuar trajnerit të Romës, Jose Mourinho, i cili njihet si “Special One”. Pas fitores në finalen e Conference League ndaj “Fejnordit” më 25 maj 2022, skuadra e “Romës” rikthehet sërish të luajë në Tiranë.
Këtë herë do të jetë skuadra e “Partizanit”, e cila do të presë në një miqësore skuadrën e drejtuar nga Jose Mourinho. Ndeshja e nesërme do të përshëndetet edhe nga këngëtari i njohur Noyzi, i cili do të përformojë për tifozët e pranishëm në stadium.
Edhe Kryebashkiaku i Tiranës Erion Veliaj, në një postim në “Twitter” nuk ka nguruar t’i tregoje Mourinjos se si do të luhet nga të kuqtë përballë tyre.
“Hey Jose Mourinho, Shqipëria njihet për mbrojtjen e bunkerit, por këtë herë Partizani do të jetë sulmues, ta garantoj”, shkruan Veliaj në postimin e tij.
