“Mos na shtyni në gjakderdhje”: Balluku e firmosi orët e fundit në zyrë, ashpërsohen protestat kundër resortit të Bashkim Ulajt

Banorët e Baks-Rrjollit në Velipojë vijojnë sot protestën e tyre, duke kundërshtuar me forcë zbatimin e projektit për ndërtimin e një resorti turistik në pronat e tyre.

Më 6 shkurt, banorët ndaluan me forcë punonjësit e kompanisë të vazhdonin punimet, ndërsa përplasjet vazhduan edhe të shtunën, kur policia shoqëroi në komisariat disa prej banorëve.

Banorët thonë se nuk do  tërhiqen nga protestat derisa projekti të pezullohet plotësisht.

Leja e ndërtimit të resortit turistik në Baks-Rrjoll është firmosur nga Belinda Balluku gjatë kohës që është e pandehur, ndërsa punimet filluan, edhe pse çështja është në proces gjyqësor.

Banorët kërkojnë takim me përfaqësues të qeverisë dhe me investitorin Bashkim Ulaj, ndërsa kushti i tyre është pezullimi i punimeve deri në gjetjen e një dakordësie.

Mes atyre që protestojnë janë edhe qytetarë nga Kosova, të cilët kanë blerë tokë në këtë zonë.

Bashkim Ulaj i njohur si biznesmeni i Berishës para ardhjes së Ramës në pushtet tanimë është përfituesi më i madh i pasurive dhe parave publike, me mbi 3 miliardë euro.

Ai është pjesë e komunikimeve komprometuese mes Belinda Ballukut dhe ish-drejtorit të ARRSH-së, Evis Berberi, ku del në pah mekanizmi i ndarjes së parasë publike si pazar.

Banorët e Baks-Rrjollit kanë theksuar se revolta e tyre do të ashpërsohet. Në një lidhje të drejtpërdrejtë nga Shkodra, gazetari Denis Bajraktari raporton mbi zhvillimin e protestave.

“Katër breza, babë, gjysh, katragjysh, që jemi këtu. Me na dhënë urdhna, zotni? Këtu më ka lënë gjyshi, këtu më ka lënë baba, këtu kam lerë vetë. I bëjmë thirrje edhe njëherë shtetit shqiptar, me një pikë pështymë, të nxjerrë ekzaktesisht se ku mund të ketë linjë ndonjë dhe çfarë trashëgimtari ka pasur ai (Ulaj) këtu. Po ka pasur, le të shkruhet tërësisht” – thotë një prej tyre.

“Ne i bëjmë një thirrje popullit të na mbështesë dhe të gjithë institucioneve shtetërore që ta vënë dorën në zemër, mos ta lëshojnë këtë popull në gjakderdhje. E keni parë edhe ju çfarë po bën policia tani dy ditë. Ne po rrimë më shumë në polici sesa te tokat tona” – thotë një protestues tjetër.

Përfaqësuesja e banorëve, Elena Pjeshka, është shprehur se kjo që po ndodh është një padrejtësi:

“Axhat e mi, babai im, gjyshi im janë gjallë. Duam drejtësi! Kam qenë sa kjo vajza kur më ka çuar babai atje duke parë tokat tona. Sot nuk na lënë me polici të ulemi atje poshtë. Është e drejta jonë. Sot kemi ardhur prej Anglisë, jemi gjallë. Dhe duam gjakun tonë! Nuk na ndalon asgjë. Kjo tokë është e jona. Kush është ai (Ulaj)? Duam drejtësi! Duam drejtësi! Sot duam përgjigje! Sot! Të na përgjigjet shteti, i bëj thirrje Edi Ramës, policisë…”.