Moti i keq/ Bllokohet nënkalimi në Fushë Mamurras, era e fortë prish dekorin festiv në Durrës

Moti i keq ka përfshirë të gjithë Shqipërinë. Në Shkodër dhe Kurbin raportohet për përmbytje dhe sipërfaqe toke nën ujë.

Reshjet të dendura shiu mëngjesin e sotëm kanë përfshirë dhe zonën e Kurbinit, dhe atë të Krujës. Bllokohet nënkalimi në Fushë Mamurras, pjesë e autostradës Milot- Thumanë. Automjetet e tonazhit të ulët një pjesë e tyre zgjedhin rrugë alternative.

Mbetet serish problematik nënkalimi në Fushë Mamurras nga bllokimi i zgarave në depërtimin e ujit. Disa automjete janë bllokuar nga prezenca e ujit. Ndërkohë në Durrës erërat e forta që kanë fryrë gjatë natës kanë rrënuar një pjesë të dekorit të vitit të ri në qendër të qytetit.

Korridori figurativ në formën e tunelit të dekoruar me drita eshtë rrëzuar gjatë reshjeve të shiut dhe erërave që kanë fryrë në orët e para të mëngjesit të sotëm.

Në Lezhë ka 570 ha tokë të përmbytur. Në njësinë administrative Milot, problem ka pasur aty ku autostrada segment i rrugës së Kombit, bashkohet me zonën e Milotit, ujërat e të cilit kanë vërshuar në afërsi të dy banesave.

Shtabi i emergjencave njofton se situata është në monitorim dhe në gadishmëri për të ndërhyrë. Niveli i lumit Mat, ka shtim të prurjeve por jo deri në pikën e rrezikut.

Në Bashkinë Mirditë ka patur sasi të mëdha shiu dhe breshëri në disa zona. Shkarkimet, nga HEC që janë në lumenjtë Mat e Fan, sipas informacioneve nuk janë problematike. Në Shkodër shtabi i emergjencave raporton se janë 3020 ha tokë nën ujë, 250 ha më shumë se u shënua pasditen e djeshme.