Vëllezërit konfliktoheshin përditë, vrasja në Tiranë ishte paralajmëruar nga postimet në FB të autorit

Krimi i dyfishtë në Tiranë e ka zanafillën tek pronësia mbi një agjenci udhëtimesh. “Noor Travel”  prej vitesh kishte futur sherr dy vëllezërit, sherr që vijoi edhe pasi drejtësia e dha vendimin para pak muajsh.

Në janar të këtij viti, gjykata vendosi që kjo agjenci udhëtimesh që dërgonte njerëz në vende të lindjes të kalonte në emër të personit që mbeti i vrarë Dritan (Alban) Muskurti.

Arsen Muskurti nuk ra dakord me vendimin. Pas muaj të tërë konfliktesh, këtë të hënë rreth orës 16:40, në rrugën “Islam Alla”, afër ‘Myslym Shyrit’, një prej zonave më të frekuentuara në kryeqytet, ai vrau vëllanë, Dritanin, dhe gruan e tij, Nora.

Arsen Muskurti, i cili njihet edhe si pronar i rrjetit të dyqaneve ‘Natyral Vita’, u vu në pranga pas disa orësh në arrati, në shtëpinë e tij në zonën e ‘5 majit’. Në kërkimin e tij u angazhua RENEA për shkak se kishte dyshime se ai është edhe radikal fetar. Autori u klasifikua si person me rrezikshmëri të lartë që mund të hapte zjarr edhe mbi policinë apo persona të tjerë.

Ngjarja ka qenë e paralajmëruar, por policia nuk ka mundur ta menaxhojë. Në profilin Facebook të autorit të krimit, përveç postimeve të lidhura me fenë islame, sheh një sërë akuzash ndaj vëllait dhe kunatës. Konflikti duket se ka nisur prej kohësh. Ai madje akuzonte të vëllanë dhe nusen e tij se kishin krijuar profile false ku shaheshin hoxhallarë.

Autori i cilësonte të vëllanë si “spiun i SHIK-ut”, “i pabesë” dhe “tradhtar”, ndërsa kunatën e quante një mostër.

“Ata po bëjnë punën me përca hoxhallarët dhe fenë Islame. Po shpifin dhe akuzojnë për njerëz kudo, familjarë dhe jo familjarë”, shkruan autori në 22 gusht, vetëm 8 ditë para se të ndodhte krimi i rëndë.

Situata është agravuar pas sherrit për pronën.

“Ti Dritan Muskurti i njohur si Alban Muskurti pronar i Noor Travel që dërgon njerëz në Umra në Arabi i bërë lanet (mallkuar) nga nëna me zemër e me shpirt, haram qumështi i nënës që merresh me të tilla akuza, shpifje, shantazhe, skuthurinash etj…Ti Nora Muskurti bashkëshortja e Dritanit (Albanit) nga mllefi që ka për vjehrrën e saj që e ka bërë lanet.

Këto që keni bërë ju i dinë të gjithë njerëzit, fisi, komshinjtë, shok, miq & dashamirës të gjithë i dinë cfarë keni bëre ju të dy burrë e grua, turp për Dritan Muskurti që flet kështu kundër vëllait të tij prej nëne, turp për Nora Muskurti, që flet kështu kundër kunatit të saj. Populli thotë: Ai që mundohet të hedh vëllain në gropë bjen vetë në grope”, shkruante autor në Facebook.

Dyshja konfliktoheshin çdo ditë, madje në Policinë e Tiranë ka dhe denoncime nga vëllezërit kundër njëri-tjetrit. Burime thonë se pak ditë para ngjarjes janë konfliktuar me njëri-tjetrin edhe për parkimin.

Arsen Muskurti shkruan se e kishte viktimën vëlla prej nëne, pra me baba të ndryshëm. Ai thotë se viktima Dritan Muskurti ka emrin e vërtet Alban, por e ka ndryshuar për shkak se ka qenë i dënuar në Itali për prostitucion dhe vjedhje, teksa shton se ka pasur 5 vjet ekspuls, për të mos hyrë në asnjë prej shteteve të Bashkimit Europian.

Si ndodhi ngjarja?
Arsen Muskurti ka debatuar fillimisht me vëllanë, Dritan dhe gruan e tij Nora në biznesin e këtyre të fundit. Më pas, autori ka nxjerrë armën dhe i ka qëlluar me 5 plumba, të cilat kanë rezultuar fatale duke marrë jetën në vend.

Kush është autori, Arsen Muskurti?
Arsen Muskurti, i njohur edhe me emrin Hamza Muskurti, ishte një biznesmen i dyqaneve ‘Natyral Vita’. Ai ka pasur probleme financiare, teksa ndaj tij ka pasur edhe një denoncim se ka ngacmuar punonjëset dhe i ka keqtrajtuar ato. Për këtë denoncim, ka paraqitur edhe një dëshmi noteriale, ku punonjëset deklarojnë se janë larguar nga puna për arsye personale.