Mundësia për të gjetur jetë në sistemin diellor sapo u shtua, pasi shkencëtarët e NASA-s zbuluan se katër hëna të Uranit mund të kenë oqeane, që mund të fshehin organizma të huaj.
Ekspertët në Laboratorin Jet Propulsion të NASA-s (JPL) kanë riekzaminuar të dhënat e kapura nga anija kozmike Voyager 2 e agjencisë hapësinore, e cila bëri disa fluturime pranë planetit në vitin 1986.
Raporti sugjeron që Ariel, Umbriel, Titania dhe Oberon, të gjithë mund të mbanin oqeane të gjera, dhjetëra milje të thellë, nën koren e tyre të akullt. Më e rëndësishmja, hënat duket se kanë nxehtësi të mjaftueshme të brendshme për të ndaluar ngrirjen e plotë të ujit, duke konkluduar se jeta aliene është teorikisht e mundur të lulëzojë 1,7 miliardë milje larg Tokës.
Oqeanet gjithashtu përmbajnë kripëra dhe amoniak, të cilët veprojnë kundër ngrirjes, duke ndihmuar mbajtjen e lëngut në gjendje ujore.
Ekipi shpreson se zbulimi do të nxisë një mision në Uran për të eksploruar botët e ujit, për të kërkuar jetë dhe për të gjetur se si hënat gjenerojnë nxehtësi të mjaftueshme për të mbajtur ujin e lëngshëm aq larg nga Dielli.
Oqeanet besohet se janë të pranishëm edhe në hënën Enceladus që rrotullohet rreth Saturnit dhe hënën e Jupiterit, Europa. Por oqeanet e tyre ngrohen përmes baticës së shkaktuar nga tërheqja e madhe gravitacionale e planetëve gjigantë.
Urani është shumë i vogël për të pasur një ndikim të tillë në hënat e tij, kështu që diçka tjetër duhet të ndodhë, – besojnë shkencëtarët.
“Kur bëhet fjalë për trupa të vegjël – planetë xhuxhë dhe hëna – shkencëtarët planetarë kanë gjetur prova të oqeaneve në disa vende të pamundura”, tha autorja kryesore Julie Castillo-Rogez e JPL (në rreth në foton majtas).
“Ka ende mekanizma në lojë që ne nuk i kuptojmë plotësisht. Ky dokument heton se cilat mund të jenë ato dhe si janë të rëndësishme për trupat e shumtë në sistemin diellor që mund të jenë të pasur me ujë, por kanë nxehtësi të kufizuar të brendshme”.
Shkencëtarët kanë menduar prej kohësh se Titania, hëna më e madhe, mund të ketë ruajtur nxehtësinë e brendshme të nevojshme për të krijuar një oqean të lëngshëm. Por 26 hënat e tjera të Uranit ishin konsideruar më parë shumë të vogla për të mbajtur një nxehtësi të tillë.
Për studimin e ri, shkencëtarët ndërtuan modele të reja duke përfshirë Voyager dhe të dhëna nga teleskopët me bazë tokësore, së bashku me gjetjet nga misionet Galileo, Cassini, Dawn dhe New Horizons të NASA-s.
Hënat planetare besohet se janë shansi më i mirë për të gjetur jetë tjetër veç Tokës, në sistemin diellor. Agjencia Evropiane e Hapësirës (ESA) kohët e fundit nisi misionin e saj Juice për të vëzhguar hënat e Jupiterit. Nëse aty kapen biosfirma si metani, kjo lë të kuptohet se ka jetë nën sipërfaqen e akullt.
Në Tokë, forma të jetës ekstremofile janë gjetur pranë vullkaneve nëntokësore dhe kanaleve të detit të thellë, duke u dëshmuar shkencëtarëve se jeta mund të mbijetojë edhe në qoshet në dukje jo mikpritëse të sistemit diellor.
a.q. / dita
