Nastradiniada e pensioneve

Nga Asim Bedalli

Botuar në DITA     

Në mbledhjen e Asamblesë Kombëtare të Partisë Socialiste, Edi Rama foli edhe për pensionistët dhe pensionet e tyre. Nuk është e para herë që kryeministri flet për pensionet. Foli edhe në kongresin e fundit të Partisë socialiste. Si rregull, ai ka folur në cdo prag zgjedhjesh. Pranon se pensionet  janë shumë të ulta, aspak dinjitoze për kontributin e tyre. Por edhe këte herë ai premtoi vetëm fjalë, si : ” Javën e dytë të muajit të ardhshëm….ne do të ndajmë me pensionistët idetë tona për rritjen e pensioneve …do fillojmë edhe informimin mbi zbatimin e një plani kombëtar për garantimin e sigurimeve shoqërore”. Pra, vetëm premtime dhe asgjë konkrete. Thuhet se në muajin tetor do të zbatohet një skemë e re, e cila do të sjellë një rritje të pensioneve. Për këtë skemë ka muaj që flitet, por ajo është kaq hermetike sa jo pensionistët e thjeshtë, por as specialistet nuk janë në gjendje të thonë sa do të jetë kjo rritje për kategori të ndryshme të pensioneve. Na mbetet të presim muajin tetor. Duket do të jetë një rritje e vogël , pa ndonjë ndikim domethënës në nivelin e sotëm të pensioneve.

Kryeministri Edi Rama në fjalimin e mbajtur në Asamblenë Kombëtare të Partisë Socialiste, premton si rrugëzgjidhje për një rritje të tyre, “.. përfshirjen e pensionistëve në ndarjen e të ardhurave të rritjes ekonomike ( të shtetit-AB)”.  Akoma pa e sqaruar çfarë nënkupton kjo “përfshirje në ndarjen e të ardhurave..”, vjen një “por” i fortë që të zgjon nga ëndërrimi. Ai thotë : “ Por që sot mund të themi qartë dhe troç…se të ardhurat nga shteti për pensionet në vitet në vijim nuk mund të jenë domethënse…nëse nuk i japim një goditje domethënse fenomenit të neveritshëm të fshehjes së pagës, fshehjes së pagave reale, që godasin.. të ardhurat nga sigurimet shoqërore”. Dhe zgjidhjen për këtë ai e sheh tek aksioni kundër atyre që nuk deklarojnë pagën reale të punonjësve dhe nuk paguajnë sigurimet shoqërore sipas kësaj page reale, duke i trajtuar ato ”…njësoj si hajdutët e energjisë elektrike”.

Uroj që aksioni që do mdërmarrë Qeveria për të detyruar bizneset të deklarojnë pagën reale të punonjësve dhe të paguajnë sigurimet shoqërore përkatse, të dalë me sukses. E kanë një përvojë të suksesshme me aksionin për pagesat e faturave elektrike, që e shpëtoi OSHEE-në nga kolapsi total ku e kishte futur Qeveria e Berishës. Por përfundimit me sukses të aksionit të pagesës të faturave elektrike ju deshën disa vite. Ndërsa aksioni për deklarimin e pagës reale të punonjësve dhe pagesa e sigurimeve shoqërore përkatëse është më kompleks e më i vështirë për t’u realizuar. Ndryshe nuk do të prisnim kaq gjatë për ta ndërmarrë. E pranon edhe vetë kryeministri kur thotë se ai nuk mund të përfundojë me sukses nëse : “…nuk i japim të gjithë bashkë, si shtet, si qeveri, si shoqëri e posaçërisht si sipërmarrje” goditjen e duhur fenomenit të fshehjes së pagave reale. Pra, ndërthuren shumë faktorë për realizimin e tij. Ai është një problem edhe për disa shtete me institucione të konsoliduara  shumë kohë para nesh. Nuk është e para herë që flitet për këte temë.  Megjithë nismat e ndërmarra, gjendja ka mbetur kjo që është tani. Në rastin më të mirë, edhe sikur aksioni të zhvillohet me sukses, do të duhet kohë që të përfundojë. Pra, edhe pensionistët do të duhet të presin ende gjatë për një ngritje të shumëpritur të pensioneve.

Kryeministri ka thënë jo rrallë se është borxhli ndaj pensionistëve. Me sa duket, thënë të gjitha këto, ai do të vazhdojë për një kohë të gjatë të mbetet borxhli ndaj tyre.  Kjo më kujton një mësim që më është dhënë shumë kohë më parë, kur isha akoma në moshën e adoleshencës,  nëpërmjet një anekdote për Nastradin Hoxhën, si shprehje e urtësisë popullore. Nastradinin e kërkonin disa persona për një borxh që duhet t’ua shlyente. Duke mos e gjetur dot, i shkojnë në shtëpi. Pasi nuk e gjejnë edhe atje, pyesin  gruan e tij:- Ku është Nastradin Hoxha?- Ajo u përgjigjet: -Është duke mbjellë pemë- Të habitur ata ia kthejnë: -Pemë!?  Dhe, me një farë mosbesimi, shkojnë në vendin që u tregoi gruaja e tij. Panë se, vërtetë Nastradin Hoxha po mbillte pemë anës së një rruge ku kalonin karvanët me pambuk. E pyesin:-  Çfarë po bën Nastradin efendi? Ai i përgjigjet:- po mbjell akacie- Të habitur ato i përgjigjen : – akacie! Po përse po i mbjell? – Nastradin Hoxha u përgjigjet: -Akacjet do rriten. Karvanët me pambukë që kalojnë këtej, një pjesë e pambukut që sjellin do t’u mbetet në gjëmbat e akacieve. Unë do t’i mbledh, ndërsa gruaja do endë sixhade me to. Sixhadet do i shesim dhe do sigurojmë paratë që u kam borxh.  Borxhdhënësit  filluan të qeshin më të madhe. Nastradin Hoxha, me atë humorin e tij të hollë, u thotë: -Qeshni ju, qeshni se e siguruat borxhin, por mua me gruan që do na bjerë bretku duke punuar… Unë duke mbledhur pambukun e gruaja duke endur sixhadet.

Dhe më tej. Edi Rama në mbledhjen e Asamblesë Kombëtare të Partisë Socialiste tha se ”… pensionistët na kanë votuar besnikërisht në të gjitha betejat tona zgjedhore”. Kjo është e vërtetë. Por kjo nuk është e gjitha meritë e Edi Ramës dhe e Partisë Socialiste. Një “meritë” të madhe këtu ka Sali Berisha. Sa kohë që në krye të Partisë Demokratike do të jetë Sali Berisha, pensionistët do të votojnë gjithmonë për Partinë Socialiste. Në momentin që opozita nuk do të udhëhiqet nga Sali Berisha, por nga një brez i ri udhëheqësish, me mendësi dhe alternativa europiane, Edi Rama dhe Partia Socialiste nuk duhet të vënë bast se veteranët do të votojnë të gjithë për ta.